ލަންކާގެ ކުރީގެ ރައީސް ރަނިލް ވިކްރަމަސިންހަ ހައްޔަރުކޮށްފި
Read Time:2 Minute, 53 Second
ފައިސާގެ ނުހައްގުން ބޭނުންކުރި ކަމުގެ ތުހުމަތުގައި ލަންކާގެ ކުރީގެ ރައީސް ރަނިލް ވިކްރަމަސިންހަ ހައްޔަރުކޮށްފިއެވެ.
ލަންކާގެ ފުލުހުން ބުނީ އުމުރުން 76 އަހަރުގެ ކުރީގެ ރައީސް ފުލުހުންގެ ބެލުމުގެ ދަށަށް ގެނެސްފައިވަނީ ކްރިމިނަލް އިންވެސްޓިގޭޝަން ޑިޕާޓްމަންޓަށް ބަޔާނެއް ދެމުން ދަނިކޮށް ކަމަށެވެ. ސްރީލަންކާގެ މީޑިއާ ތަކުން ރިޕޯޓް ކުރާ ގޮތުގައި ވިކްރަމަސިންހަ ހައްޔަރުކޮށްފައި ވަނީ، ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރެއްވުމުގެ ކުށުގެ ތުހުމަތުގައި ކަމުގައެވެ.
ރަނިލްގެ މައްޗަށް ކޮށްފައިވާ ތުހުމަތަކީ އޭނާގެ ވެރިކަމުގައި ކުރެއްވި ދަތުރުތަކަށް ދައުލަތުގެ ފައިސާ ބޭނުން ކުރެއްވި ކަމުގެ ތުހުމަތުތަކެކެވެ. އެގޮތުން 2023 ވަނަ އަހަރު އޭނާގެ އަނބިކަނބަލުން، މައިތުރީ ވިކްރަމަސިންހަގެ ގްރެޖުއޭޝަން ހަފްލާގައި ބައިވެރިވުމަށްޓަކައި ލަންޑަންގެ ޔުނިވަރސިޓީ އޮފް ވުލްވަހެމްޕްޓަން އަށް ކުރެއްވި ދަތުރު މި ކޭސްގައި ހިމެނެއެވެ.
ތަހުގީގަށް އެނގިފައިވާ ގޮތުން އޭނާ ވަނީ ދައުލަތުގެ ފައިސާއިން ގާތްގަނޑަކަށް 50،000-56،000 ޑޮލަރު ބޭނުންކޮށްފައެވެ. ވިކްރަމަސިންހަ ވަނީ އެ ވާހަކަތައް ދޮގުކޮށް، އެ ހަރަދުތަކަކީ އަމިއްލަ އަތުން ކުރެއްވި ހަރަދުތަކެއް ކަމަށް ވިދާޅުވެފައެވެ.
ވިކްރަމަސިންހަ ހައްޔަރުކުރި އިރު މިއީ ލަންކާގެ ކުރީގެ ވެރިއެއް ހައްޔަރުކުރި ފުރަތަމަ ފަހަރެވެ. މި ފިޔަވަޅު އަޅާފައި މިވަނީ ރައީސް އަނޫރާ ކުމާރާ ދިއްސާނަޔަކޭގެ ސަރުކާރުގައި ކޮރަޕްޝަނާ ދެކޮޅަށް ފުޅާ ދާއިރާއެއްގައި ފަށާފައިވާ ކެމްޕޭނެއްގެ ދަށުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %