ގޭންގު ކުށްތައް ހުއްޓުވުމަށް ހަރުކަށި ފިޔަވަޅުތަކެއް
Read Time:4 Minute, 15 Second
ރާއްޖޭގައި ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތަށް ހުއްޓުވުމަށް ގާނޫނަށް ގެނައި އިސްލާހާއެކު ހަރުކަށި ފިޔަވަޅުތަކެއް އެޅުމައް ތައްޔާރު ވެއްޖެއެވެ.
ގޭންގު ކުށްތައް ހުއްޓުވުމުގެ ގާނޫނަކީ ގޭންގު ކުށްތައް ހިމެނޭހެން ހިންގާ ބޮޑެތި ކުށްތަކާއި ނުރައްކާތެރި ކުށްތައް ހުއްޓުވުމަށް، އެފަދަ ކުށްތަކަށް އަދަބު ކަނޑައެޅުމާއި ކުށްކުރާ ފަރާތައް ފިޔަވަޅު އެޅުމަށް ތަންފީޒީ އިދާރާތަކަށް ހާއްސަ ބާރެއް ދިނުމުގެ ގޮތުން އެކުލަވާލާފައިވާ ގާނޫނެކެވެ. މި ގާނޫނަށް މިއަދުން ފެށިގެން އަމަލުކުރަން ވަނީ ހަމަޖެހިފައެވެ.
މި ގާނޫނުގެ ދަށުން ގޭންގެއް ނުވަތަ ކުށްކުރާ ގްރޫޕެއް އުފައްދައިފި ނަމަ ނުވަތަ ހިންގައިފިނަމަ 25 އަހަރުގެ ޖަލު ހުކުމަކާއެކު 200،000 ރުފިޔާއާއި 10 މިލިޔަން ރުފިޔާއާ ދެމެދުގެ ޖޫރިމަނާއެއް ކުރެވޭނެއެވެ. އަދި މިފަދަ ގްރޫޕަކަށް ކުޑަކުއްޖަކު ރެކްރޫޓްކޮށްފި ނަމަ 25 އަހަރުގެ ޖަލު ހުކުމަކާއެކު 200،000 ރުފިޔާއާއި 10 މިލިޔަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި ބޮޑު މީހަކު ރެކްރޫޓް ކޮށްފިނަމަ 20 އަހަރުގެ ޖަލު ހުކުމަކާއެކު 100،000 ރުފިޔާއާ 7 މިލިޔަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
ގޭންގަކާއި ގުޅިގެން ނުވަތަ ގޭންގް ހަރަކާތުގައި އުޅޭ މީހަކު، އޭނާ ހޯދާފައިވާ މުއްސަނދި ކަމަކީ ހުއްދަގޮތުގައި ހޯދާފައިވާ މުއްސަނދިކަމެއްކަން ސާބިތުކޮށްނުދެވޭ ނަމަ އޭނާގެ މުއްސަނދި ކަމަކީ ނުހައްގުން ހޯދާފައިވާ މުއްސަނދިކަމެއްކަން ކަނޑައަޅައިދިނުމަށް ޕީޖީއަށް ހުށަހެޅޭނެ އެވެ. އަދި ކޯޓުން އެގޮތަށް މައްސަލަ ނިންމައިފި ނަމަ ދައުލަތަށް އެ މުދަލާއި ފައިސާ ނެގޭނެއެވެ.
މީގެ އިތުރުން ހަތިޔާރު އުފައްދައި، ނުވަތަ އެތެރެކޮށް، ނުވަތަ ވިއްކައި އަދި ގެންގުޅޭ ފަދަ އަމަލެއް ކުރާ މީހާ ކޯޓު އަމުރަކާނުލައި އެމީހަކު ހުއްޓުވައި ފާސްކުރުމާއި ހައްޔަރުކުރުމުގެ ބާރު ފުލުހުންނަށް ލިބޭނެއެވެ.
ގޭންގުތައް ހުއްޓުވުމަށް ގެނައި މި އިސްލާހާއި ގުޅިގެން މި ގާނޫނަށް ރައްޔިތުން އަހުލުވެރިކުރުވުމަށް މިރޭ ފޯރަމެއް ކުރިއަށްގެން ވަނީ ހަމަޖެހިފައެވެ. ޕީޖީއިން ބުނީ ދިވެހި ފުލުހުންގެ ހިދުމަތާ ގުޅިގެން ގޭންގުތައް ހުއްޓުވުމުގެ ބިލާ ގުޅޭގޮތުން މައުލޫމާތު ދިނުމަށް ހާއްސަ ސެޝަނެއް މިރޭ 9:00 ގައި ކުރިއަށް ގެންދިއުމަށް ހަމަޖެހިފައިވާ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %