ލަންކާގައި ހިންގާ ގަވާއިދާ ޙިލާފު ކޯސްތަކަށް ސަމާލުވާން އެދެފި

Read Time:4 Minute, 23 Second

ސްރީލަންކާގައި ގަވާއިދާ ޙިލާފަށް ކޯސްތަކެއް ހިންގާތީ ދިވެހި ދަރިވަރުން އެ ގައުމުގައި ކިޔަވަންފެށުމުގެ ކުރިން ސަމާލުވާން މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން އެދެފިއެވެ.

ކިޔެވުން ފެށުމުގެ ކުރިން ކިޔަވަން ގަސްތުކުރާ މަރުކަޒާއި ކިޔަވަން ގަސްތުކުރާ ކޯހަކީ އެމްކިއުއޭއިން ބަލައިގަން ކޯހެއްތޯ ކަށަވަރަރުކުމަށް އެމްކިއުއޭ އިން މި ދިޔަ ބުރާސްފަތި ދުވަހު ނެރުނު ނޫސް ބަޔާނެއްގައި އެދިފައިވެއެވެ.

ދިވެހިރާއްޖޭގެ ގައުމީ ސަނަދުތަކުގެ އޮނިގަނޑަށް ފެތޭ އަދި އެ ފެންވަރުގެ ޕްރޮގްރާމަކަށް ވަނުމަށް ކަނޑައަޅާފައިވާ އެންޓްރީ ކްރައިޓީރިއާ ފުރިހަމަވާ ޕްރޮގްރާމްތަކާއި، ލަންކާގެ ޓާޝަރީ އެންޑް ވޮކޭޝަނަލް އެޑިއުކޭޝަން ކޮމިޝަނާއި، ޔުނިވާސިޓީ ގްރާންޓްސް ކޮމިޝަން އަދި ސްރީލަންކާގެ މިނިސްޓްރީ އޮފް އެޑިއުކޭޝަން، ހަޔާ އެޑިއުކޭޝަން އެންޑް ވޮކޭޝަނަލް އެޑިއުކޭޝަންއިން ހުއްދަ ދީފައިވާ މަތީ ތަޢުލީމު ދޭ މަރުކަޒުތަކުންނާއި އެ މަރުކަޒުތަކުން ހިންގާ ޕްރޮގްރާމްތައް ބަލައިގަންން ކަމަށް އެމްކިއު އޭއިން ބުނެފައިވެއެވެ.

ހަޔާ ޑިޕްލޮމާއިން ދަށުގެ ޓާޝަރީ ޕްރޮގްރާމްތަކަށް ހުއްދަދެމުން އަންނަނީ ސްރީލަންކާގެ ޓާޝަރީ އެންޑް ވޮކޭޝަނަލް އެޑިއުކޭޝަން ކޮމިޝަނުންނެވެ. ޑިގްރީއަށް ވުރެ މަތީގެ ޕްރޮގްރާމްތަކަށް ހުއްދަދެމުން އަންނަނީ ސްރީލަންކާގެ ޔުނިވާސިޓީ ގްރާންޓްސް ކޮމިޝަން އަދި ސްރީލަންކާގެ މިނިސްޓްރީ އޮފް އެޑިއުކޭޝަނ ހަޔާ އެޑިއުކޭޝަން އެންޑް ވޮކޭޝަނަލް އެޑިއުކޭޝަނުންނެވެ.

އެމްކިއުއޭގެ ބަޔާނުގައި ހުއްދައާއި ނުލައި، ހުއްދަ ދޭ މިންގަނޑާ ޚިލާފަށް ބައެއް މަރުކަޒުތަކުން ޕްރޮގްރާމް ހިންގާކަމާއި، އެ ފަދަ ޕްރޮގްރާމްތައް އެހެން ގައުމަކާ ގުޅިގެން ހިންގާކަން ހާމަކޮށްފައިވެއެވެ.

”އެހެންކަމުން ހުއްދަ ދީފައިވާ މިގަނޑާއި ޚިލާފަށް އެތަންތަނުން ހިންގާ ޕްރޮގްރާމްތަކުގެ ސެޓިފިކެޓް މި އޮތޯރިޓީން މީގެ ފަހުން ގަބޫލުނުކުރާނެ ވާހަކަދަންނަވަމެވެ. ވުމާއެކު، ދަރިވަރުން ކިޔަވަން ދިއުމުގެ ކުރިން އެމްކިއުއޭއިން ދޫކުރަމުން އަންނަ ”އިންޓެންޑެޑް“ ލިޔުން ހޯދުމަކީ މުހިންމު ކަމެއް ކަމުގައި ދަންނަވަމެވެ،“ ބަޔާނުގައިވެއެވެ.

’ވަގު ސެޓްފިކެޓް‘ ގެ މައްސަލަ ބޮޑުވެފައިވާކަން ފާހަގަ ކޮށް އެ މައްސަލައިގައި މީގެ ކުރިން ވަޒީފައިގައި ތިބި މީހުންގެްސަނަދު ’ވެރިފައި‘ ކުރާވަރަށް އެމަސަލަ ބޮޑުވެފައިވާ ކަމަށް އެމްކިއުއޭ އިން ބުނެފައިވެއެވެ.