އަފްޣާނިސްތާން-ޕާކިސްތާން ބޯޑަރުގައި ހަމަލާ ބަދަލުކޮށް، ދެޤައުމުގެ ދެމެދުގައި ހަނގުރާމައެއް ފަށައިފި

Read Time:4 Minute, 21 Second

އަފްޣާނިސްތާނުގެ ވެރިކަން ކުރާ ތާލިބާނާއި ޕާކިސްތާނާ ދެމެދު ހަމަލާތައް ބަދަލުކޮށް، ނުރައްކާތެރި ހަނގުރާމައަކަށް މިސްރާބު ޖަހައިފިއެވެ.

މި ހަމަލާތައް ފެށިފައިވަނީ، މިދިޔަ ހަފްތާގެ ކުރީކޮޅު އަފްޣާނިސްތާނުގެ ވެރިރަށް ކާބުލް ކައިރިއަށް ޕާކިސްތާނުން ވައިގެ ހަމަލާތަކެއް ދިން ކަމަށް ތާލިބާނުން ބުނާ ބުނުމަކާ ގުޅިގެންނެވެ. ނަމަވެސް ޕާކިސްތާނުން މިކަމެއް އަދި ކަށަވަރުކޮށްދީފައެއް ނުވެއެވެ.

ޕާކިސްތާނުން މިކަން ކަށަވަރުކޮށްދީފައި ނުވި ނަމަވެސް، އޭގެ ފަހުން ދެ ފަރާތުގެ މެދުގައި ވަނީ ހަމަލާ ބަދަލުކޮށް، ބޯޑަރު ކައިރީ ހަމަނުޖެހުން އިތުރުވެފައެވެ.

ދެ ފަރާތުން ވެސް ބޯޑަރު ޕޯސްޓުތަކެއް ހިފާފައިވާ ކަމަށް ދަނީ ބުނަމުންނެވެ. ތާލިބާނުން ބުނާ ގޮތުގައި، ޕާކިސްތާނުގެ 50 އަށް ވުރެ ގިނަ ސިފައިން މަރާލާ، އެތައް ޕޯސްޓެއް އެމީހުންގެ ބާރުގެ ދަށަށް ގެނެސްފައިވެއެވެ. ނަމަވެސް، ޕާކިސްތާނުން ބުނަނީ ތާލިބާނުގެ ހަތިޔާރު އެޅި ފަރާތްތަކުގެ މައިގަނޑު މަރުކަޒުތައް ހަލާކުކޮށްލާ، އެމީހުން ފަހަތަށް ޖައްސާލާފައިވާ ކަމަށެވެ. ދެ ފަރާތުން ދެނީ ތަފާތު އަދަދުތަކެއް ކަމުން، މިކަމުގެ ހަގީގަތް މިނިވަން އެއްވެސް ފަރާތަކުން އަދި ކަށަވަރުކޮށްދީފައެއް ނުވެއެވެ.

މި ހަމަލާތަކާ ގުޅިގެން ޕާކިސްތާނުން ވަނީ މައިގަނޑު ބޯޑަރު ދޮރުތައް ކަމަށްވާ ތޯކަމް އާއި ޗާމަން ބަންދުކޮށްފައެވެ. މިކަމުގެ ސަބަބުން ދެ ގައުމާ ދެމެދު ކުރެވޭ ވިޔަފާރި އާއި ދަތުރުފަތުރު ވަނީ މުޅިން ހުއްޓިފައެވެ. ބޯޑަރު ކައިރީގައި ދިރިއުޅޭ ރައްޔިތުން ތިބީ ވަރަށް ބޮޑު ކަންބޮޑުވުމެއްގައެވެ. އެއީ ހަމަލާތަކުގެ ސަބަބުން އެ ސަރަހައްދު ރައްކާތެރިކަން ކުޑަވެފައިވާތީއެވެ.

ތާލިބާނުން ޕާކިސްތާނަށް ތުހުމަތުކުރަނީ އެމީހުންގެ ސަރަހައްދަށް ހަމަލާދޭ ކަމަށެވެ. ޕާކިސްތާނުން ބުނަނީ ތާލިބާނުންގެ ހިމާޔަތުގައި ޕާކިސްތާނުގެ ހަނގުރާމަވެރިން އަފްޣާނިސްތާން ތެރޭގައި ތިބެ، ޕާކިސްތާނަށް ހަމަލާދޭން ފުރުސަތު ދެމުންދާ ކަމަށެވެ. މިފަދަ މައްސަލަތައް މި ދެ ގައުމުގެ މެދުގައި ކުރިންވެސް ހުރިއިރު، މިހާރު މި ވަނީ އިތުރަށް މައްސަލަ ގޯސްވެފައެވެ.

މި ސަރަހައްދުގެ އަވަށްޓެރި ގައުމުތަކާއި ބައިނަލްއަޤްވާމީ ޖަމާއަތްތަކުން ދަނީ ދެ ފަރާތުން ހަމަލާތައް ހުއްޓާލައި، ސުލްހައިގެ މަޝްވަރާތައް ފެށުމަށް ގޮވާލަމުންނެވެ. ނަމަވެސް، މި ވަގުތާ ހަމައަށް ވެސް ހަނގުރާމަ ހުއްޓާލާނެ އެއްވެސް ނިޝާނެއް ފެންނާކަށް ނެތެވެ.