ފޮރިން އިންވެސްޓްމެންޓްތައް އިތުރުވެ، ރާއްޖޭގެ އިގްތިސާދަށް ބޮޑު ކުރިއެރުމެއް

Read Time:4 Minute, 17 Second

އަހަރެއްހާ ދުވަހުގެ ތެރޭގައި 108 ބޭރުގެ އިންވެސްޓެމެންޓު ރާއްޖެއަށް ގެނެސްފައިވާ ކަމަށް މިނިސްޓަރ އޮފް އިކޮނޮމިކް ޑެވެލޮޕްމެންޓް އެންޑް ޓްރޭޑް، މުހައްމަދު ސައީދު ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމް ނިއުސް އިން ރިޕޯޓްކޮށްފައިވާ ގޮތުގައި މިނިސްޓަރ ސައީދު ވިދާޅުވީ މި ސަރުކާރުން ރާއްޖެއަށް ފޮރިން އިންވެސްޓްމެންޓް އިތުރު ކުރުމުގެ ގޮތުން ކުރަމުން އަންނަ މަސައްކަތުން ބޮޑު ކުރިއެރުމެއް ލިބިފައިވާ ކަމަށެވެ. އެގޮތުން އަހަރެއްހާ ދުވަސްތެރޭ 108 ފޮރިން އިންވެސްޓްމެންޓްސް ލިބިފައިވާ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރާއްޖެއަށް ބޭރުގެ އިންވެސްޓްމެންޓް އިތުރު ކުރުމަށް ސަރުކާރުން ގިނަ މަސައްކަތްތަކެއް ކުރައްވާ ކަމަށާއި، ރާއްޖެއިން ބޭރަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ ކޮންމެ ފުރަމާނަ ދަތުރުފުޅެއްގެ ތެރެއިން އެ ވަޑައިގަންނަވާ ގައުމެއްގައި ބިޒްނަސް ފޯރަމްތަކެއް ބާއްވަވައި ކަމަށެވެ. އަދި މި ފޯރަމްތަކުގައި ރާއްޖޭގެ ވިޔަފާރިވެރިންނާއި ބޭރުގެ ވިޔަފާރިވެރިން ބައިވެރިވެއެވެ.

މިނިސްޓަރ ސައީދު ވަނީ 2007 އިން ފެށިގެން މިހާތަނަށް ރާއްޖެއަށް ލިބިފައިވާ އިންވެސްޓްމެންޓުތަކުގެ ތަފާސްހިސާބުތައް ހިއްސާ ކޮށްދެއްވާފައެވެ.

ނޮވެމްބަރ 2007 – ނޮވެމްބަރ 2013 : 206 އިންވެސްޓްމަންޓް
ޑިސެމްބަރ 2013 – ނޮވެމްބަރ 2018 : 403 އިންވެސްޓްމަންޓް
ޑިސެމްބަރ 2018 – ނޮވެމްބަރ 2023 : 398 އިންވެސްޓްމަންޓް
ޑިސެމްބަރ 2023 އިން މިހާތަނަށް : 108

”މީގެ ތެރެއިން އެންމެ ރަނގަޅު އަހަރަކީ 2013 އިން 2018 އަށް ކަމަށް ބަލަމާ، 403 ގާތްގަނޑަކަށް. ފަސް އަހަރަށް ބަލާއިރު އަހަރަކު 81 ފޮރިން އިންވެސްޓްމެންޓު މިއިންނަނީ. ރައީސް ޑރ. މުޢިއްޒު ވެރިކަމާއި ހަވާލުވެވަޑައިގަތުމަށް ފަހު 108 ފޮރިން އިންވެސްޓެމެންޓު މިއިންނަކީ އަހަރެއްގެ ތެރޭގައި. މިއީ ވަރަށް ބޮޑު ކުރިއެރުމެއް ލިބިގެން ދިޔަ.“ މިނިސްޓަރ ވިދާޅުވިއެވެ.

ބޭރުގެ އިންވެސްޓްމެންޓް އިތުރު ކުރުމަށް ގިނަ މަސައްކަތްތަކެއް ސަރުކާރުން އަންނަނީ ކުރަމުންނެވެ. އެގޮތުން ސަރުކާރުން ވަނީ ޗައިނާ، ޔޫއޭއީ، އިންޑިއާ، މެލޭޝިއާ، ސިންގަޕޫރު އަދި އިންގިރޭސިވިލާތުގައި ބިޒްނަސް ފޯރަމް ބާއްވާފައެވެ. އަދި އިންވެސްޓަރުންނަށް ފަހި މާހައުލެއް ގާއިމްކުރުމަށް ފޮރިން އިންވެސްޓްމެންޓްގެ ޒަމާނީ އައު ގާނޫނެއްވެސް ސަރުކާރުން ވަނީ ތައާރަފްކޮށްފައެވެ.