ކުރީގެ ރައީސުންނާއި މެންބަރުންގެ ބައެއް އިނާޔަތްތައް އުނިކުރަން ހުށަހަޅަނީ

Read Time:4 Minute, 46 Second

ކުރީގެ ރައީސުންނާއި މެންބަރުންގެ ބައެއް އިނާޔަތްތައް އުނިކުރަން ގާނޫން އިސްލާހު ކުރުމަށް ހުށަހެޅުއްވުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.

ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި އެމަނިކުފާނު ވަނީ ކުރީގެ ރައީސުންނާއި މެންބަރުންނަށް ލިބިދޭ ބައެއް އިނާޔަތްތައް އުނިކުރުމަށް ގާނޫނުތައް އިސްލާހު ކުރަން ރައްޔިތުންގެ މަޖިލީހަށް ހުށަހެޅުމަށް ސަރުކާރުން ނިންމައިފައިވާކަން އިއުލާންކުރައްވާފައެވެ.

”ރައީސުލްޖުމްހޫރިއްޔާކަން ކޮށްފައިވާ ފަރާތްތަކަށާއި ރައްޔިތުންގެ މަޖިލީހުގެ މެންބަރުކަން ކޮށްފައިވާ ފަރާތްތަކަށް ޤާނޫނުތަކުން ލިބިދޭ ބައެއް އިނާޔަތްތައް އުނިކުރުމަށް ޤާނޫނުތައް އިސްލާހު ކުރަން ރައްޔިތުންގެ މަޖިލީހަށް ހުށަހެޅުމަށް ސަރުކާރުން ވާނީ ނިންމާފައި. އަދި މީގެ އިތުރުން ދައުލަތުގެ ވަޒީފާތަކުން ރިޓަޔަރ ކުރާ ފަރާތްތަކަށް ލިބެމުންދާ ޕެންޝަން އިނާޔަތްތައް އެއްހަމަ ކުރުމަށްޓަކާ ޤާނޫނުތަކާއި ޤަވާއިދުތަކަށް ގެންނަންޖެހޭ އިސްލާހުތައް ގެނައުމުގެ މަސައްކަތްވެސް މިހާރުދަނީ ކުރެވެމުން. އެގޮތުން ދައުލަތުގެ ވަޒީފާއަކުން ރިޓަޔަރވުމުން ޕެންޝަން އިނާޔަތް ލިބެމުންދާ ފަރާތެއް އަލުން ދައުލަތުގެ ވަޒީފާއަކަށް އައުމުން، ވަޒީފާގައި ހުންނަ މުއްދަތުގައި އެ އިނާޔަތް މެދުކަނޑާލަންޖެހޭ ގޮތަށް ގަވާއިދުތައް އިސްލާހުކުރެވިގެންދާނެ.“ ރައީސް ކުރެއްވި ޕޯސްޓްގައި ވިދާޅުވިއެވެ.

މިފަހުން ސޯޝަލް މީޑިއާގައި ވަނީ ކުރީގެ ރައީސުންނާއި މެންބަރުންނަށް ދައުލަތުން ކުރާ ހަރަދުތަކުގެ ތަފްސީލް އާންމުވެފައެވެ. މިކަމާއި ގުޅިގެން ގިނަ ބަޔަކު ވަނީ ހިތްހަމަ ނުޖެހުން ފާޅުކޮށް، އިނާޔަތްތައް އެކީ ކަނޑާލަން ގޮވާލާފައެވެ.

ކުރީގެ ރައީސުންނަށް އިނާޔަތް ދޭން ފެށީ 2009 ވަނަ އަހަރުގައެވެ. އެގޮތުން އެއް ދައުރުކޮށްފައިވާ ރައީސުންނަށް ކޮންމެ މަހަކު 50,000 ރުފިޔާ އަދި އެއް ދައުރަށްވުރެ ގިނަ ދައުރުކޮށްފައިވާ މީހަކަށް، 75,000 ރުފިޔާ ލިބެ އެވެ. އަދި މީގެ އިތުރުން ކުރީގެ ރައީސުންނަށް ދިރިއުޅޭނެ ތަނެއް ހަމަޖައްސަން އިތުރު 50،000 ރުފިޔާއެއް ދޭއިރު، އޮފީސް ހިންގުމުގެ ހަރަދުގެ ގޮތުގައި 175،000 އެއްހާ ރުފިޔާ ދެއެވެ.

ކުރީގެ މެންބަރުންނަށް ވެސް މިފަދަ ބޮޑެތި އިނާޔަތްތަކެއް އަންނަނީ ދެމުންނެވެ. އެގޮތުން މަޖިލީހުގެ މެންބަރުކަން ކޮށްފައިވާ ފަރާތްތަކަށް، އުމުރުން 55 އަހަރުވުމުން، އެއް ދައުރު މެންބަރުކަން ކުރެއްވި ފަރާތްތަކަށް މުސާރައިގެ 30 ޕަސެންޓު އަދި ދެ ދައުރު މެންބަރުކަން ކުރެއްވި ފަރާތްތަކަށް މުސާރައިގެ 45 ޕަސެންޓް ލިބެއެވެ. އަދި މީގެ އިތުރުން ހެލްތު އިންޝޫރަންސް ވެސް އެމީހުނަށް ލިބެއެވެ.