އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުގެ މަގާމުން ފަޒީލް ވަކިކޮށްފި
Read Time:3 Minute, 14 Second
އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދު އޭނާ ހުރި މަގާމުން ވަކިކޮށްފި އެވެ.
އޭނާ މަގާމުން ވަކިކޮށްފައި މިވަނީ ޑިސެންބަރު 19، 2024 އިން ފެށިގެން މުސާރަ ލިބޭގޮތަށް ސަސްޕެންޝަންގައި ބެހެއްޓުމަށް ފަހުއެވެ.
އެމްޑަބްލިއުއެސްސީން މިއަދު އެކްސްގައި ކުރި ޕޯސްޓެއްގައި ބުނެފައިވަނީ 9 ޖުލައި 2025 އިން ފެށިގެން ސަސްޕެންޝަންގައި ހުރި އެކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދު މަގާމުން ވަކިކުރަން ޑިރެކްޓަރުންގެ ބޯޑުން ނިންމާފައިވާ ކަމަށެވެ. އަދި އެއީ އެކުންފުނީގެ މަސްލަހަތު ރައްކާތެރިކުރަން ޑިރެކްޓަރުންގެ ބޯޑުން ނިންމި ނިންމުމެއް ކަމަށް ވެސް ޕޯސްޓްގައި ބުނެފައިވެއެވެ.
ފަޒީލްގެ މައްޗަށް ވަނީ ވަގު ލިޔުންތަކެއް ހުށަހަޅައިގެން ހުޅުމާލޭ ފޭސް ދޭކުން ގޯއްޗެއް ހޯދަން އުޅުނު މައްސަލައިގައި ތުހުމަތުކުރެވިފައެވެ. އަދި މި މައްސަލައިގެ ތަހުގީގުތަކާއި ގުޅިގެން އޭނާ ސަސްޕެންޑް ކުރެވުނުއިރު، މައްސަލައިގައި އެންމެ ބޮޑު ތުހުމަތެއް ކުރެވެނީ ފަޒީލްގެ ބޭބެ އަދި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށެވެ.
އެމްޑަބްލިއުއެސްސީން ކުރި ޕޯސްޓްގައި އިތުރަށް ބުނެފައިވަނީ ފަޒީލުގެ މައްޗަށް ކުރިއަށް ގެންދެވޭ ތަހުގީގާ އެކު އިސްމަގާމެއްގައި މުސާރަޔާއެކު ދިގު މުއްދަތަކަށް ބެހެއްޓުމަކީ ކުންފުނީގެ މަސްލަހަތު ހިމެނޭ ކަމެއްނޫން ކަމަށް ބޯޑުން ނިންމާފައިވާ ކަމަށެވެ.
ފަޒީލް ރަޝީދަށް ”ބިންވެރިޔާ“ ސްކީމްގެ ދަށުން ވަގަށް ގޯއްޗެއް ހޯދަން އުޅުނު ކަމުގެ ތުހުމަތު ކުރެވިފައިވާއިރު، އޭނާ އަކީ މީގެ ކުރިން ހިންގި ސޯޝަލް ހައުސިންގ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވުމާއެކު އޭނާގެ ޝަރުތު ހަމަނުވާނެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %