ލަސްވުމަށް ވުރެ ފުރާނަ މުހިންމު! ދުއްވާ ފަރާތްތަކަށް ފުލުހުންގެ ހާއްސަ މެސެޖެއް
Read Time:3 Minute, 9 Second
މަގުމަތީގެ ސަލާމަތާއި ރައްކާތެރިކަމަށް ހޭލުންތެރިކުރުވުމުގެ ގޮތުން ދިވެހި ފުލުހުންގެ ހިދުމަތުން ހާއްސަ ހަރަކާތްތަކެއް ފަށައިފިއެވެ.
ހުޅުމާލެ ފުރަތަމަ ފިޔަވަހީގައި އިއްޔެ ފެށި މި ހަރަކާތުގައި ފުލުހުން ވަނީ ހެނދުނު އޮފީސްތަކަށާއި ސްކޫލުތަކަށް މީހުން ދަތުރު ކުރާ ޓްރެފިކް ބާރުބޮޑު ވަގުތުގައި މަގުތަކަށް ނުކުމެ ރައްޔިތުންގެ ސަލާމަތާއި ރައްކާތެރިކަމާ ގުޅޭ މެސެޖުތައް ފޯރުކޮށްދީފައެވެ.
އެގޮތުން ލައުޑް ސްޕީކަރު ބޭނުން ކޮށްގެން ދުވެލި މަޑުކުރުމަށާއި ފުރާނައިގެ އަގުބޮޑުކަން ހަނދާންކޮށްދިނުމަށް މެސެޖު ފޯރުކޮށްދީ، ”ލަސްވުމަށް ވުރެ ފުރާނަ މުހިންމު!“ މިހެން ލިޔެފައިވާ ބޯޑެއް ހިފައިން ފުލުހުން އެކި މަގުތަކުގައި ތިބެއެވެ. އަދި ފުލުހުން ތިބޭ ސަރަަހައްދު ތަކުގައި އެކްސިޑެންޓް ހިނގައިގެން އުޅޭ މަންޒަރު ސިފަކޮށްދޭ ކޮދަށް ވެހިކަލް ބަހައްޓާފައި ހުރެއެވެ.
ފުލުހުންގެ މިހަރަކާތް އިއްޔެ ހުޅުމާލެ ފުރަތަމަ ފިޔަވަހީގައި ފެށި އިރު، މިއަދު ހެނދުނު މި ހަރަކާތް ވަނީ ހުޅުމާލެ ދެވަނަ ފިޔަވަހީގައި ވެސް ކުރިޔަށް ގެންގޮސްފައެވެ.
އެކްސިޑެންޓްތައް މަދުކުރުމުގެ ގޮތުން ހަރަކާތްތަކެއް ކުރިޔަށް ގެންދިޔުމަށް ފުލުހުން ފަށާފައިމިވަނީ މި ފަހުން ހިނގި ނުރައްކާތެރި އެކްސިޑެންޓެއްގައި މަޝްހޫރު ލަވަކިޔުންތެރިން ކަމަށްވާ މުހައްމަދު އަބްދުލްޣަނީ (ތޭރަވާ) އާއި މަރިޔަމް އަޝްފާގެ 17 އަހަރުގެ ދަރިފުޅު އަލްސަން ނިޔާވެފައި ވަނިކޮށެވެ.
އަދި ފުލުހުން އާންމުކުރި ތަފާސް ހިސާބުގައި ވާގޮތުން މިއަހަރުގެ ފުރަތަމަ ހަމަހުގެ ތެރޭ މާލެ ސަރަހައްދުގައި ވަނީ 1101 އެކްސިޑެންޓް ހިނގާފައެވެ. މީގެ ތެރެއިން 61 އެކްސިޑެންޓްގައި ސީރިއަސް އަނިޔާތަކެއް ވެފައިވާ ކަމަށް ތަފާސް ހިސާބުން ދައްކައެވެ.
Happy
50 %
Sad
50 %
Excited
0 %
Sleepy
0 %
Angry
0 %
Surprise
0 %