އިސްރާއިލްއިން އަލްޖަޒީރާގެ 5 ނޫސްވެރިއަކު ޣައްޒާގައި މަރާލައިފި
Read Time:4 Minute, 3 Second
އިސްރާއީލުން އާދީއްތަ ދުވަހުގެ ރޭ ޣައްޒާ ސިޓީއަށް ދިން ހަމަލާއެއްގައި އަލްޖަޒީރާގެ 5 ނޫސްވެރިއަކު މަރާލައިފިއެވެ.
އަލްޖަޒީރާގެ ނޫސްވެރިޔާ އަނަސް އަލް ޝަރީފާއި އަދި އިތުރު ހަތަރު އަލް ޖަޒީރާގެ މުއައްޒަފުން މަރުވެފައި ވަނީ އާދީއްތަ ދުވަހުގެ ރޭ ޣައްޒާ ސިޓީގެ އަލް ޝިފާ ހޮސްޕިޓަލުގެ ބޭރުގައި ނޫސްވެރިންނަށް ހާއްސަކޮށްގެން ހަދާފައިވާ ޓެންޓަކަށް އިސްރާއީލުން ދިން ހަމަލާއެއްގަ އެވެ.
މި ހަމަލާގައި ޖުމްލަ ހަތް މީހަކު މަރުވެފައިވާއިރު، އޭގެ ތެރޭގައި އަލްޖަޒީރާގެ މުހައްމަދު ޤްރެއިޤް އާއި ކެމެރާ އޮޕަރޭޓަރުން ކަމަށްވާ އިބްރާހިމް ޒާހިރު، މުހައްމަދު ނޫފާލް، އަދި މުއާމަން އަލިވާ ހިމެނެ އެވެ.
މަރުވުމުގެ ކުރިން އުމުރުން 28 އަހަރުގެ އަލް ޝަރީފް ވަނީ ޣައްޒާއަށް އިސްރާއީލުން ދެމުންދާ ހަމަލާތަކާއި ބެހޭ ގޮތުން ސޯޝަލް މީޑިއާގައި ޕޯސްޓް ކޮށްފައެވެ. މަރުވެއްޖެ ހާލަތަކަށް ތައްޔާރު ކުރި މެސެޖެއްގައި އޭނާ ވަނީ ފުން ވޭންތަކެއް ތަހައްމަލު ކުރަން ޖެހުނު ނަމަވެސް، ރައްޔިތުންނަށް ކުރިމަތިވެފައިވާ ތަކުލީފުތަކުގެ ހަގީގަތް ކިޔައިދިނުން ހުއްޓާނުލާ ކަމަށް ބުނެފަފައެވެ. އަދި އަނބިމީހާ ދޫކޮށްލާފައި ދަރިން ބޮޑުވާތަން ނުފެނުމުން ހިތާމަކުރާކަން ވެސް އޭނާ ފާހަގަކޮށްފައި ވެއެވެ.
އަލްޖަޒީރާއިން ވަނީ މި ހަމަލާއަކީ ހަނގުރާމައާ ބެހޭ ގޮތުން ރިޕޯޓްކުރާ ނޫސްވެރިންގެ އަޑު ކަނޑުވާލުމަށް ގަސްތުގައި ދިން ހަމަލާއެއް ކަމަށް ސިފަކޮށް މި ހަމަލާ ކުށްވެރިކޮށްފައެވެ. އަދި އާންމުންނާއި ނޫސްވެރިންނަށް ދޭ ހަމަލާތައް ހުއްޓުވުމަށް މުޅި ދުނިޔެއަށް ގޮވާލާފަ އެވެ. އެ ނެޓްވޯކުން ބުނެފައި ވަނީ އަލްޝަރީފާއި އޭނާގެ ޓީމަށް އަމާޒުކޮށް ދިން ހަމަލާއަކީ ޣައްޒާގައި ނޫސްވެރިކަމުގެ މިނިވަންކަމާ ދެކޮޅަށް ހިންގާ ފުޅާ ކެމްޕޭނެއްގެ ބައެއް ކަމަށެވެ.
އިސްރާއީލުން އަންނަނީ ޣައްޒާގައި ތިބި ނޫސްވެރިންނަކީ ހަމާސްގެ މެންބަރުން ކަމަށް ތުހުމަތުކޮށް އެމީހުންގެ މަސައްކަތްތަކަށް ހުރަސް އަޅަމުންނެވެ. 2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާގައި 200 އަށް ވުރެ ގިނަ ނޫސްވެރިންނާއި މީޑިއާ މަސައްކަތްތެރިން މަރާލާފައިވާއިރު، އޭގެ ތެރޭގައި އަލްޖަޒީރާގެ ބައެއް މީހުންނާއި އެމީހުންގެ އާއިލާތައް ވެސް ހިމެނެ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %