ތައިލެންޑްގައި ފަތުރުވެރިންނަށް ކްރިޕްޓޯ ބޭނުންކުރެވޭ ގޮތް ހަދައިފި
Read Time:3 Minute, 8 Second
ތައިލެންޑްގައި ”ޓުއަރިސްޓްޑިޖިޕޭ“ ގެ ނަމުގައި ފަތުރުވެރިންނަށް ކްރިޕްޓޯކަރަންސީ ބޭނުންކުރެވޭ ގޮތް ހަދައިފިއެވެ.
މި ޕްރޮގްރާމްގެ ސަބަބުން ބޭރުގެ ފަތުރުވެރިންނަށް ކްރިޕްޓޯކަރަންސީ ތައި ބާތަށް ބަދަލުކުރެވޭނެ އެވެ. މިގޮތަށް ބަދަލުކުރާ ބާތު ރައްކާކޮށްފައި ހުންނަނީ އިލެކްޓްރޯނިކް ވޮލެޓެއްގައެވެ. އަދި މި ވޮލެޓް ބޭނުން ކޮށްގެން ތައިލެންޑްގައި ގަންނަ ތަކެއްޗާއި ހިދުމަތްތަކަށް ކިއުއާރު ކޯޑުން ފައިސާ ދެއްކޭނެ އެވެ.
މި ނިޒާމަކީ ސަރުކާރުން ހިންގާ ސޭންޑްބޮކްސް މަޝްރޫއެއްގެ ބައެކެވެ. މާނައަކީ މި ސިސްޓަމް ދާއިމީ ކުރާނީ ނުވަތަ އިތުރު ކުރާނީ 18 މަސް ދުވަހުގެ މުއްދަތަށް ޓެސްޓް ކުރުމަށް ފަހު އެވެ.
ޓޫރިސްޓްޑިޖީޕޭ ބޭނުން ކުރުމަށް ފަތުރުވެރިން ނޯ ޔޯރ ކަސްޓަމަރ (ކޭވައިސީ) ޗެކްތަކުން ފާސްވާން ޖެހެ އެވެ. މިއީ މަނީ ލޯންޑަރިން އާއި އެހެނިހެން ޖަރީމާތައް ހުއްޓުވުމަށް ކުރާ ކަމެކެވެ. އަދި ފައިސާ ހަރަދު ކުރެވޭ މިންވަރުގެ ލިމިޓެއްވެސް ކަނޑައަޅާފައި ވެއެވެ. އެގޮތުން ކުދި ފިހާރަތަކުގައި ފަތުރުވެރިންނަށް މަހަކު 50،000 ބާތު އާއި ހަމައަށް ވިޔަފާރި ކުރެވޭނެ އެވެ. އަދިބޮޑެތި ފިހާރަތަކުގައި ލިމިޓަކީ މަހަކު 500،000 ބާތު އެވެ.
ތައިލެންޑް ސަރުކާރުން އުންމީދު ކުރަނީ މި ނިޒާމުގެ ސަބަބުން ފަތުރުވެރިންނަށް ތައިލެންޑުގައި ފައިސާ ހޭދަކުރުމަށް ފަސޭހަވެގެންދާނެ ކަމަށެވެ. އެގައުމުގެ އޮފިޝަލުން ބުނާ ގޮތުގައި މި ނިޒާމުގެ ސަބަބުން ފަތުރުވެރިކަމުގެ އާމްދަނީ ގާތްގަނޑަކަށް %10 ނުވަތަ 175 ބިލިއަން ބާތު އިތުރުވެދާނެ އެވެ.
ތައިލެންޑުން މި ފެށި ސިސްޓަމަކީ ދުނިޔޭގައި ކްރިޕްޓޯކަރަންސީ ލޯކަލް ފައިސާއަށް ބަދަލުކޮށްގެން ފަސޭހައިން ހަރަދު ކުރެވޭ ގޮތަށް ހެދި ފުރަތަމަ ސިސްޓަމެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %