ބެލްޖިއަމްއިން ފަލަސްތީން މިނިވަން ޤައުމެއްގެ ގޮތުގައި ބަލައިގަނެ، އިސްރާއީލާއި ދެކޮޅަށް ފިޔަވަޅު އަޅަން ނިންމައިފި
Read Time:4 Minute, 1 Second
ފަލަސްތީންނަކީ މިނިވަން ޤައުމެއްގެ ގޮތުގައި ބަލައިގަނެ އެކަން މިމަހުގައި ބާއްވާ އދ ގެ އާންމު މަޖިލީހުގައި އިއުލާންކުރާނެކަމަށް ބެލްްޖިއަމްގެ ޑެޕިއުޓީ ޕްރައިމް މިނިސްޓަރ އަދި ހާރިޖީ ވަޒީރު މެކްސިމް ޕްރެވޮޓް ވިދާޅުވެއްޖެއެވެ.
ސޯޝަލްމީޑިއާ އެކްސްގެ ޕޯސްޓެއްގައި މެކްސިމް ޕްރެވޮޓް ވިދާޅުވެފައިވަނީ، ފަލަސްތީން އަކީ މިނިވަން ގައުމެއްގެ ގޮތުގައި އދ ގެ އާންމު މަޖިލީހުގައި ބެލްޖިއަމުން ބަލައިގަންނާނެ ކަމަށާއި، އަދި އިސްރާއީލުގެ ސަރުކާރާ ދެކޮޅަށް ހަރުކަށި ފިޔަވަޅުތަކެއް އަޅާނެކަމަށެވެ. އެގޮތުން އެގައުމުން ވަނީ އިސްރާއީލާ ދެކޮޅަށް 12 ހަރުކަށި ފިޔަވަޅުތަކެއް އަޅާނެކަމަށް ވިދާޅުވެފައެވެ. މީގެ ތެރޭގައި އިސްރާއީލުގެ ބިންތަކުން އުފައްދާ ތަކެތި އެތެރެކުރުން މަނާކުރުމާއި، އިސްރާއީލުގެ ކުންފުނިތަކާއެކު ސަރުކާރުގެ ޕްރޮކިއުމަންޓް ސިޔާސަތުތައް މުރާޖަޢާކުރުން ހިމެނެއެވެ.
މި އިޢުލާނާއެކު، ފަލަސްތީނުގެ މިނިވަންކަމަށް ތާއީދުކުރާ ޤައުމުތަކުގެ ލިސްޓަށް ބެލްޖިއަމް އިތުރުވެގެންދާނެއެވެ. ޖުލައި މަހުގެ ފަހުކޮޅު، ފްރާންސްގެ ރައީސް އެމެނުއެލް މެކްރޯން ވެސް ވަނީ ސެޕްޓެމްބަރު 9 އިން 23 އަށް ނިއު ޔޯކުގައި ބޭއްވޭ އދ. ގެ ޢާންމު މަޖިލީހުގައި ފްރާންސުން ފަލަސްތީން ބަލައިގަންނާނެކަމަށް އިޢުލާނުކުރައްވާފައެވެ. އެއާއެކު، އިތުރު ގިނަ ޤައުމުތަކަކުންވެސް ވަނީ އެގޮތަށް ޢަމަލުކުރާނެކަމަށް ބުނެފައެވެ. ނަމަވެސް ބައެއް ޤައުމުތަކުން ވަނީ އެ ޤައުމުތަކުން ފަލަސްތީން ބަލައިގަތުމުގައި ޝަރުޠުތަކެއް ކަނޑައަޅާނެކަމަށް ހާމަކޮށްފައެވެ.
މި އަހަރުގެ އޭޕްރިލް މަހާ ހަމައަށް، އދ. ގެ މެމްބަރު 147 ޤައުމަކުން ވަނީ ފަލަސްތީނުގެ ދައުލަތް ރަސްމީކޮށް ބަލައިގެންފައެވެ. ބެލްޖިއަމްއިން ފަލަސްތީން ބަލައިގަތުމަށް އިއުލާން ކުރައްވާފައިވަނީ، އިސްރާއީލުން ޣައްޒާއަށް ދެކޮޅަށް ހިންގާ ހަނގުރާމައިގައި މަދުވެގެން 63,459 މީހުން މަރުވެ، 160,256 މީހުން ޒަޚަމްވެފައިވާ މިފަދަ ނާޒުކު ދަނޑިވަޅެއްގައެވެ.
މީގެއިތުރުން، ބެލްޖިއަމުގެ ޕްރޮސެކިއުޓަރުން ވަނީ އިސްރާއީލުގެ ދެ ސިފައިން މީހެއްގެ މައްޗަށް ހަނގުރާމައިގެ ކުށުގެ މައްސަލައެއް އިންޓަރނޭޝަނަލް ކްރިމިނަލް ކޯޓަށް (އައިސީސީ) ފޮނުވާފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %