ދުނިޔޭގެ އިޤްތިސާދަށް ބޮޑެތި ބަދަލުތަކެއް، ޑޮލަރަށް ބަރޯސާވުން ކުޑަވެދާނެ
Read Time:4 Minute, 39 Second
އެމެރިކާގެ ދަރަނި 37.85 ޓްރިލިއަން ޑޮލަރަށް އަރައި، ދުނިޔޭގެ މާލީ ނިޒާމުގެ ހަމަޖެހުމާ މެދު ކަންބޮޑުވުންތައް އިތުރުވެއްޖެއެވެ. މިކަމުގެ ސަބަބުން ޑޮލަރަށް ބިނާވެފައިވާ ދުނިޔޭގެ އިޤްތިސާދަށް ބޮޑެތި ބަދަލުތަކެއް އަންނާނެ ކަމަށް ބެލެވެއެވެ.
ޑޮލަރުގެ މާޒީ އަދި މުސްތަޤުބަލު:
1971 ވަނަ އަހަރުން ފެށިގެން އެމެރިކާ ޑޮލަރަކީ ރަނުގެ މައްޗަށް ”ބެކް“ ކޮށްފައިވާ ފައިސާއެއް ނޫނެވެ. ޑޮލަރުގެ އަގު ބިނާވެފައިވަނީ އެމެރިކާގެ ސަރުކާރާއި އިޤްތިޞާދަށް ދުނިޔޭގެ ފަރާތްތަކުން ކުރާ އިތުބާރުގެ މައްޗަށެވެ. އެހެންކަމުން ޑޮލަރަކީ ”ފިއެޓް“ ނިޒާމެއްގެ ތެރެއިން ހިންގާ ފައިސާއެކެވެ. ދުނިޔޭގައި ގިނަ ގައުމުތަކުން ތެޔޮ ގަންނައިރު އަގު ކަނޑައަޅާފައިވަނީ ޑޮލަރަށް ކަމަށްވުމުން، ދުނިޔޭގެ އެކި ޤައުމުތަކުން ޑޮލަރަށް އޮންނަ ޑިމާންޑާއެކު ޑޮލަރުގެ އަގު ހިފެހެއްޓެއެވެ. މި ނިޒާމުގެ ސަބަބުން ދިވެހި ރުފިޔާ ވެސް ހިމެނޭ ގޮތަށް ގިނަ ގައުމުތަކުގެ ފައިސާގެ އަގު ވަނީ އެމެރިކާ ޑޮލަރާ ގުޅިފައެވެ.
ޤައުމުތަކުގެ އިޤްތިޞާދީ ރައްކާތެރިކަން ކަށަވަރުކުރުމަށް އަޅާ ފިޔަވަޅުތައް:
އެމެރިކާގެ ދަރަނި އިތުރުވަމުންދާ ވަރަކަށް، ބައެއް ގައުމުތަކުން އަންނަނީ ޑޮލަރަށް ބަރޯސާވުން ކުޑަކުރަމުންނެވެ. މިގޮތުން ގިނަ ގައުމުތަކުން ރަން ގަންނަން ފަށާފައިވާއިރު، އެ ގައުމުތަކުގެ ފައިސާ ބޭނުންކޮށްގެން ވިޔަފާރި އިތުރުކޮށް، ޑިޖިޓަލް ފައިސާގެ ނިޒާމުތައް ދަނީ ދިރާސާކުރަމުންނެވެ.
މިހާރު ރަނުގެ މާކެތްގައި 30 ޓްރިލިއަން ޑޮލަރުގެ ރަން ހުރިކަމަށް ލަފާކުރެވޭއިރު، ރަނަކީ މިފަދަ ވަގުތު ތަކުގައި އެންމެ ރައްކާތެރި އިންވެސްޓްމެންޓެވެ.
އިންޑިއާ އާއި ދިވެހިރާއްޖެއިން ވެސް ވަނީ ދެ ގައުމުގެ ފައިސާ ބޭނުންކޮށްގެން ވިޔަފާރި ކުރުމަށް ފަހިކޮށް، ގުޅުންތައް ބަދަހިކޮށްފައެވެ. މީގެ އިތުރުން ”ބްރިކްސް“ ގައުމުތަކުން ވެސް އަންނަނީ ޑޮލަރު ބޭނުންނުކޮށް ވިޔަފާރި ކުރުމަށް މިފަދަ ނިޒާމެއް ހެދުމަށް މަސައްކަތްކުރަމުންނެވެ.
މުޅި ދުނިޔެއިން އަންނަނީ މަޑުމަޑުން މަލްޓިޕޯލާ މާލީ ނިޒާމަކަށް ބަދަލުވަމުންނެވެ. މިއީ އެމެރިކާގެ ދަރަނި މައްޗަށް ބަރޯސާވުން ކުޑަ، އަދި ހަގީގީ މާލީ އަސާސްތަކާއި، ސަރަހައްދީ ފައިސާއާއި، ޑިޖިޓަލް ފައިސާގެ މައްޗަށް ބިނާވާ ނިޒާމެކެވެ.
ގައުމުތަކުން އިޤްތިސާދު ރައްކާތެރި ކުރުމަށް ގިނަ ފިޔަވަޅުތަކެއް އަޅަމުން އަންނަ މިފަދަ ވަގުތެއްގައި ކުރަން ޖެހޭނެ ސުވާލަކީ ދުނިޔޭގެ އިޤްތިސާދަށް މިފަދަ ބަދަލުތަކެއް އަންނާނެތޯއެއް ނޫނެވެ. މިވަގުތު ކުރުން އެންމެ ރަނގަޅު ސުވާލަކީ މި ބަދަލުތައް އަންނާނީ ކޮން އިރަކުންތޯއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
100 %