2026 ވަނަ އަހަރު ދިވެހިރާއްޖޭގެ އިޤްތިޞާދު %5.3 ކުރިއަރާނެކަމަށް ލަފާކޮށްފި

Read Time:3 Minute, 51 Second

މިނިސްޓަރ އޮފް ފިނޭންސް މޫސާ ޒަމީރު 2026 ވަނަ އަހަރުގެ ބަޖެޓް ހުށަހަޅުއްވަމުން ފާހަގަކުރެއްވި ގޮތުގައި، ފަތުރުވެރިކަމާއި އިންފްރާސްޓްރަކްޗަރ ތަރައްޤީގެ ދާއިރާގައި ފާހަގަކުރެވޭ ކުރިއެރުމާއެކު، 2026 ވަނަ އަހަރު ދިވެހިރާއްޖޭގެ އިޤްތިޞާދު %5.3 އިން ކުރިއަރާނެކަމަށް ލަފާކޮށްފިއެވެ.

ދިވެހިރާއްޖޭގެ އިޤްތިޞާދުގެ މައިގަނޑު ބިންގަލަކީ ފަތުރުވެރިކަން ކަމުގައިވާއިރު، މި ދާއިރާ އުންމީދުކުރެވުނު މިންވަރަށްވުރެ މަތީ ދަރަޖައެއްގައި ކުރިއަރަމުންދާކަން ފާހަގަކުރެވެއެވެ. މިގޮތުން، 2025 ވަނަ އަހަރުގެ ފުރަތަމަ 8 މަސްދުވަހުގެ ތެރޭގައި 1.5 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާކަމާއި، މިއީ ފާއިތުވި އަހަރާ އަޅާބަލާއިރު %9.4 ގެ އިތުރުވުމެއްކަން ފާހަގަކުރެއްވިއެވެ. ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު ފަދަ ބޮޑެތި އިންފްރާސްޓްރަކްޗަރ ޕްރޮޖެކްޓްތަކުގެ ސަބަބުން މެދުރާސްތާގައި (2026-2028) އަހަރަކު އެވަރެޖްކޮށް %4.9 ގެ އިޤްތިޞާދީ ކުރިއެރުމެއް ހޯދޭނެކަމަށް ލަފާކުރެވެއެވެ.

ފަތުރުވެރިކަމުގެ ދާއިރާގެ ކުރިއެރުމާއެކު، ދަތުރުފަތުރު، މުވާޞަލާތު، ވިޔަފާރި އަދި ޢިމާރާތްކުރުމުގެ ދާއިރާތަކަށްވެސް އޭގެ އިޖާބީ އަސަރު ފޯރާނެކަމަށް ބެލެވެއެވެ. ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމްތަކުގެ (ޕީއެސްއައިޕީ) ސަބަބުން ރިއަލް އެސްޓޭޓް އަދި ޢިމާރާތްކުރުމުގެ ދާއިރާ އަހަރަކު %3.1 އިން ކުރިއަރާނެކަމަށް ލަފާކުރެވޭއިރު، ފާއިތުވި ދުވަސްތަކުގައި އެކިއެކި ގޮންޖެހުންތަކާ ކުރިމަތިލާންޖެހުނު މަސްވެރިކަމުގެ ދާއިރާވެސް އައު ކުރިއެރުންތަކެއް ހޯދާނެކަމަށް ލަފާކުރެވެއެވެ.

ޤައުމުގެ މާލީ ހަރުދަނާކަން އިތުރުވަމުންދާއިރު، ރަސްމީ ރިޒަރވް 2024 ވަނަ އަހަރުގެ 673.9 މިލިއަން އެމެރިކާ ޑޮލަރުން 2026 ވަނަ އަހަރު 903.7 މިލިއަން އެމެރިކާ ޑޮލަރަށް އިތުރުވާނެކަމަށް ލަފާކުރެވެއެވެ. މި ކުރިއެރުން ހާސިލުކުރުމަށް އިޤްތިޞާދީ ދުވެލި އިތުރުވުމާއި ބޭރު ފައިސާގެ ޤަވާޢިދުތަކަށް ގެނެވޭ އިޞްލާޙީ ބަދަލުތަކުން މަގުފަހިވާނެކަމަށް މިނިސްޓަރ ފާހަގަކުރެއްވިއެވެ.