ހަންގުރާމަ ހުއްޓާލުމުގެ އެއްބަސްވުމާއި ގާތްވެފައިވަނިކޮށް އިސްރާއީލުން ޣައްޒާގައި 300 އަށްވުރެ ގިނަ މީހުން ޝަހީދުކޮށްލައިފި

Read Time:5 Minute, 12 Second

ޣައްޒާ ސަރުކާރުގެ މީޑިއާ އޮފީހުން ވިދާޅުވެފައި ފާއިތުވި 48 ގަޑިއިރުގެ ތެރޭގައި އިސްރާއީލު ސިފައިން ފަލަސްތީނުގެ 300 އަށް ވުރެ ގިނަ މީހުން ޝަހީދުކޮށްލާފައިވާ ކަމަށާއި، މި ހާލަތް ސިފަކުރަނީ އިޒްރޭލުން މި މުއްދަތުގެ ތެރޭގައި ”26 ލޭ އޮހޮރުވުމުގެ ޖަރީމާއެއް ހިންގާފައިވާ“ ކަމަށް މީޑިއާ އޮފީހުން ވިދާޅުވެފައިވެއެވެ. ބުރާސްފަތި ދުވަހުގެ ފަތިހުން ފެށިގެން އިސްރާއީލުގެ އަމަލުތަކުގެ ސަބަބުން މިހާތަނަށް 73 މީހެއްގެ ފުރާނަ ގެއްލިފައިވާއިރު، އޭގެ ތެރޭގައި އިސްރާއީލާއި އެމެރިކާގެ އެހީތެރިކަން ފޯރުކޮށްދޭ ޣައްޒާ ހިއުމެނިޓޭރިއަން ފައުންޑޭޝަން (ޖީއެޗްއެފް) ގެ އެހީދޭ ތަންތަނުގައި އެހީތެރިކަން ހޯދަމުން ދިޔަ 33 މީހުން ވެސް ހިމެނެއެވެ.

ދެކުނުގެ އަލްމަވާސީގައި ހުންނަ ޓެންޓަކަށް އިޒްރޭލު ސިފައިން ދިން ހަމަލާއެއްގައި 13 މީހެއްގެ ފުރާނަ ވަނީ ގެއްލިފަ އެވެ. މީގެ އިތުރުން ޣައްޒާ ސިޓީގެ ހުޅަނގުން ގެދޮރު ގެއްލިފައިވާ މީހުން ދިރިއުޅެމުން ދިޔަ މުސްތަފާ ހާފިޒް ސްކޫލަށް ދިން ހަމަލާގައި 11 މީހުން މަރުވެ އެތައް ބަޔަކު ޒަހަމްވެފައިވާ ކަމަށް އަލްޖަޒީރާއިން ރިޕޯޓުކޮށްފައިވެއެވެ.

ސަރުކާރުގެ މީޑިއާ އޮފީހުން ބުރާސްފަތި ދުވަހު ނެރުނު ބަޔާނެއްގައި ބުނެފައި ވަނީ ފާއިތުވި 48 ގަޑިއިރުގެ ތެރޭގައި ދިން ހަމަލާތަކުގެ ސަބަބުން ގެދޮރު ގެއްލިފައިވާ އެތައް ހާސް ބަޔަކު ދިރިއުޅެމުންދާ ހިޔާތަކާއި ތޮއްޖެހިފައިވާ ޑިސްޕްލޭސްމަންޓް ސެންޓަރުތަކުގައި ތިބި އާންމުންނަށާއި، އާންމުން އަރާމުކުރާ ސަރަހައްދުތަކަށާއި، މާރުކޭޓުތަކާއި، ޒަރޫރީ މަދަނީ ފެސިލިޓީތަކުގައި ތިބި އާންމުންނަށް އަމާޒުކޮށް، ބަނޑުހައިހޫނުކަމުގެ ސަބަބުން ކާބޯތަކެތި ހޯދަމަށް ނިކުމެ އުޅޭ ހާލުގައި ޖެހިފައިވާ އާންމުންނަށް ހަމަލާދީފައިވާ ކަމަށެވެ.

ދާދި ފަހުން ޖީއެޗްއެފްގެ އެހީދޭ މަރުކަޒުތައް ކައިރީގައި ފަލަސްތީނު މީހުން ޝަހީދުކޮށްލި ހާދިސާއާ ބެހޭ ގޮތުން ދީރް އަލް ބާލާހު އިން ރިޕޯޓް ކުރައްވަމުން އަލްޖަޒީރާގެ ތާރިގު އަބޫ އަޒްޒޫމް ވިދާޅުވީ ”ކާބޯތަކެތީގެ އަސާސީ ސާމާނު ލިބޭނެ ކަމުގެ އުއްމީދުގައި އެތައް ގަޑިއިރެއް ވަންދެން އިންތިޒާރު ކުރަމުން ދަނިކޮށް ރައްޔިތުން ބިރުވެރި މަންޒަރުތައް ކިޔައިދީފައިވާ ކަމަށާއި ހަމައެކަނި ކުއްލިއަކަށް އަދި އެއްވެސް އުޒުރެއް ނެތި ބަޑީގެ ހަމަލާތަކާ ކުރިމަތިލާން… މިއަދު ހެނދުނު ސަލާމަތްވި އެތައް ބަޔަކާ ކޮންޓެކްޓްވެ، އެމީހުން އަޅުގަނޑަށް ވަރަށް ހިތާމަވެރި ހިސާބުތައް ފޯރުކޮށްދީ، ޖީއެޗްއެފްއިން ހިންގާ އެހީގެ މަރުކަޒުތައް ކައިރީގައި ހިނގި ބިރުވެރި ހާދިސާތައް ހިއްސާކޮށްފައި ވޭ.“

މިދިޔަ އަހަރުގެ 7 އޮކްޓޯބަރުގެ ފަހުން އިސްރާއިލުން ދެމުން އަންނަ ހަމަލާތަކުގައި ޣައްޒާގެ 56,647 އަށްވުރެއް ގިނަ އަދަދަކަށް މީހުން ވަނީ ޝަޙީދުކޮށްލާފައެވެ. އަދި 134,105 އެއްހާ މީހުން ޒަޚަމްވެފައިވާ ކަމަށް ޣައްޒާގެ ސިއްހަތާ ބެހޭ ވުޒާރާއިން ބުނެއެވެ.