އައު ސުޕަރމޭން ފިލްމާއެކު އިސްރާއީލް މީހުން ރަތަށް!

Read Time:3 Minute, 31 Second

ޑެބިއުގައި 122 މިލިއަން ޑޮލަރު ހޯދި އައު ސުޕަރމޭން ފިލްމަށް ވަނީ އެތައް ބައެއްގެ ތަރުހީބް ލިބިފައެވެ. ޖޭމްސް ގަން އުފެއްދި މި އައު ފިލްމާއެކު ދުނިޔޭގެ ހުރިހާ ސިނެމާތަކެއް ގައި މި ފިލްމް ބެލުމަށް މީހުންތައް ތޮއްޖެހިފައި އޮތްއިރު، މި ފިލްމް ދެކެ ރުޅި އައިސް ފިލްމް ބޮއިކޮޓް ކުރުމަށް ގޮވާލާ ބަޔަކު އެބަ ތިއްބެވެ. އެއީ އިސްރާއިލް މީހުންނާއި އެމީހުންގެ ސަޕޯޓަރުންނެވެ.

އިސްރާއީލްގެ މީހުން މި ފިލްމް ދެކެ ރުޅި އަންނަނީ ފިލްމްގައި ދައްކުވައި ހިޔާލީ ދެ ގައުމު ކަމަށްވާ ބޮރޭވިއާ އަދި ޖަހަންޕޫރްގެ ސަބަބުންނެވެ. މި ފިލްމްގައި ބޮރޭވިއާ އަކީ އެމެރިކާއިން ތާއީދުކުރާ މުއްސަނދި، އަސްކަރީ ދައުލަތެއް އޮންނަ ގައުމެކެވެ. އަދި ޖަހަންޕޫރް އަކީ ބޮވޭރިއާ އިން ގިނަ ބޮމުގެ ހަމަލާތަކެއް ދެމުން އަންނަ އަވަށްޓެރި ފަގީރު ގައުމެކެވެ.

މި ފިލްމްގައި ބޮވޭރިއާ އިން ދޭ ހަމަލާތަކުގެ މަންޒަރުތައް ވައްތަރީ އަސްލު ދުނިޔޭގައި އިސްރާއީލްގެ އައިޑީއެފް ސިފައިން އަރައި ޣައްޒާގައި ދެމުން އަންނަ ހަމަލާތަކާއެވެ. އަދި ޖަހަންޕޫރް ސަލާމަތް ކުރުމަށް ބުނެ ބޮވޭރިއާއިން އެ ގައުމުގެ އާންމުން ނައްތާލުމަށް ކުރާ މަސައްކަތުން ސިފަ ވަނީ އިސްރާއީލުން ހަމާސް ނައްތާލަނީ ކަމަށް ބުނެ ޣައްޒާގައި ހިންގާ އަމަލުތަކެވެ.

މި ފިލްމްގެ ސަބަބުން އިސްރާއީލްގެ މީހުންނާއި، އެމީހުންގެ ސަޕޯޓަރުން ވަނީ ސޯޝަލް މީޑިއާގައި ފިލްމަށް ފާޑުކިޔައި، ފިލްމް ބޮއިކޮޓް ކުރަން ގޮވާފައެވެ. އަދި ފިލްމްގެ ޑިރެކްޓަރު ޖޭމްސް ގަން އަށް އޭނާ އަކީ އިސްރާއިލް އާއި ދެކޮޅު މީހެއް ކަމަށް ގޮވައި އޭނާ އަކީ ” އެންޓި ސެމިޓިކް” މީހެއް ކަމަށްވެސް ގޮވާފައިވެއެވެ.

މިކަމާއި ގުޅިގެން ގަން ބުނެފައިވަނީ އޭނާ މި ފިލްމް ލިޔުނުއިރު މެދުއިރުމަތީގެ މި ހަނގުރާމަ ނުވެސް ފަށާ ކަމަށެވެ. އަދި އެހަނގުރާމަ އާއި ވައްތަރު ނުކުރަމަށްޓަކައި އެކި މަސައްކަތް ކުރި ކަމަށާއި، ފިލްމްގައި ފެންނަނީ މެދުދުއިރުމައްޗާ ގުޅުން ހުރި ކަމެއް ނޫން ކަމަށެވެ.