މަޝްހޫރު ރޮކް ލެޖެންޑް އޮޒީ އޮސްބޯން މަރުވެއްޖެ

Read Time:2 Minute, 59 Second

ޕާކިންސަން ބަލީގައި ގިނަ ދުވަސްތަކެއް އުޅުމަށް ފަހު މަޝްހޫރު ރޮކް ލެޖެންޑް އޮޒީ އޮސްބޯން ރޭގެ ވަގުތެއްގައި މަރުވެއްޖެއެވެ.

އުމުރުން 76 ގައި އޭނާ މަރުވިއިރު އޭނާ ކައިރީގައި އޭނާގެ އާއިލާ މީހުން ތިއްބެވެ.

އޮޒީގެ ކެރިއަރުގެ އެންމެ ފާހަގަ ކޮށްލެވެނީ އޭނާ އިނގިރޭސި ވިލާތުގެ މަޝްހޫރު މެޓަލް ބޭންޑް، ބްލެކް ސަބަތުގެ ލީޑް ލަވަކިޔުންތެރިޔާގެ ގޮތުގައެވެ. އަދި ތަފާތު އަޑަކާއި، ވާލެއްގެ ބޮލުގަ ދަތް އެޅުން ފަދަ ސްޓޭޖް އެކްޓްތަކުން މަޝްހޫރުވެ އޭނާ ވެގެން ދިޔައީ މިއުޒިކް އައިކޮނަކަށެވެ.

މަސްތުވާތަކެތީގެ މައްސަލަތަކެއްގެ ސަބަބުން ބްލެކް ސެބަތު ދޫކޮށްލުމަށްފަހު އޭނާ ވަނީ ބްލިޒާޑް އޮފް އޮޒް ފަދަ ހިޓް ލަވަތަކުން ކާމިޔާބު ސޯލޯ ކެރިއަރެއް ފަށާފައެވެ. ފަހުގެ އަހަރުތަކުގައި އޮޒީ ވަނީ ރިއަލިޓީ ޝޯ ”ދަ އޮސްބޯންސް“ އިން ފެނިގެން ގޮސް، އޮޒީގެ ޕާސަނަލް ދިރިއުޅުން ދައްކާލާފައެވެ. އޭނާ ކައިވެނި ކުރީ އޭނާގެ ކެރިއަރު ވެސް މެނޭޖްކުރި ޝެރޯން އޮސްބޯން އާ އެވެ. އެދެމީހުން އެކުގައި ބޮޑު މިއުޒިކް ބްރޭންޑެއް ބިނާކުރިއިރު، އޭގެ ތެރޭގައި ”އޮޒްފެސްޓް ފެސްޓިވަލް“ ވެސް ހިމެނެ އެވެ.

އިނގިރޭސިވިލާތުގެ ބާމިންހަމްއަށް 1948 ވަނަ އަހަރު އުފަންވި އޮޒީ އޭނާގެ ހަޔާތުގެ ފުރަތަމަ ދުވަސްތައް ހޭދަކުރީ ފަގީރު އަދި އާދައިގެ ދިރިއުޅުމެއްގައެވެ. ނަމަވެސް ފަހުން އޭނާ ވަނީ މިއުޒިކްގެ ދުނިޔޭގެ ކާމިޔާބު ހޯދައި، ކުރިއަރައިގެން ގޮސްފައެވެ.

އޮޒީ ވަނީ މީގެ ދެ ހަފްތާ ކުރިންވެސް ބްލެކް ސަބަތު ބޭންޑާއެކު ޕާފޯމް ކޮށްފައެވެ. ބޭންޑް އުފެދުނު ސިޓީ ބަރމިންހަމްގައި ދިން މި ޝޯ އަކީ ބޭންޑްގެ އެންމެ ފަހު ކޮންސަރޓް ކަމަށް ކަނޑައަޅައި ދިން ޝޯ އެކެވެ.