އެމްއެންސީސީއައި އިން ރާއްޖެ ޒިޔާރަތް ކުރި ޗައިނާގެ ވިޔަފާރި ވަފުދަކާއެކު ފޯރަމެއް ކުރިޔަށް ގެންގޮސްފި

Read Time:6 Minute, 23 Second

މޯލްޑިވްސް ނޭޝަނަލް ޗެމްބަރ ފޮރ ކޮމާރސް އެންޑް އިންޑަސްޓްރީ (އެމްއެންސީސީއައި) އާއި ޗައިނާ ކައުންސިލް ފޮރ ދަ ޕްރޮމޯޝަން އޮފް އިންޓަރނޭޝަނަލް ޓްރޭޑް (ސީސީޕީއައިޓީ) ގުޅިގެން ދެ ގައުމުގެ ދެމެދުގައި އޮތް ވިޔަފާރީގެ ގުޅުން ވަރުގަދަ ކުރުމަށް ހާއްސަ ފޯރަމެއް ކުރިޔަށް ގެންގޮސްފިއެވެ.

މާގިރި ހޮޓަލުގައި މިއަދު ހަވީރު ކުރިޔަށް ދިޔަ މި ފޯރަމްގައި ވަނީ ރާއްޖޭގެ އެސޯސިއޭޝަން ތަކާއި، ކުންފުނިތަކުގެ އިތުރުން ޗައިނާގެ ޔުއްނާން ޕްެރޮވިންސަށް ނިސްބަތްވާ ކުންފުނިތަކުން ބައިވެރިވެފައެވެ. މީގެ އިތުރުން މި ފޯރަމްގައި އެމްއެންސީސީއައިގެ އިސްވެރިންނާއި، ސީސީޕީއައިޓީގެ ޔުއްނާން ޕްރޮވިންސްގެ ޗެއަރމަން އަދި ރާއްޖެއަށް ހަމަޖައްސަވާފައިވާ ޗައިނާގެ އެމްބެސެޑަރު ބައިވެރިވެވަޑައިގެންފައި ވެއެވެ.

މި ފޯރަމްގައި ދެ ގައުމުގެ ވިޔަފާރިވެރިން ވަނީ މަޝްވަރާކޮށް، ޗައިނާ އިން ރާއްޖެއަށް އިމްޕޯޓް ކުރެވިދާނެ ތަފާތު މުދާތަކާއި ޕްރޮޑަކްޓްތަކުގެ މައުލޫމާތު ބަދަލުކޮށްފައެވެ. މި ފޯރަމްގައި އެމްޓީސީސީ، ރެޑްވޭވް، އެސްޓަރސް ފަދަ ރާއްޖޭގެ ބޮޑެތި ވިޔަފާރިތަކުން ބައިވެރިވެފައިވެއެވެ. މި ފޯރަމްގެ އެންމެ މުހިންމު ބޭނުމަކީ ޗައިނާގެ އިންވެސްޓަރުންނާއި ވިޔަފާރިތަކުން ރާއްޖޭގެ ވިޔަފާރިތަކާ ގުޅިގެން، ޗައިނާގެ ޔުއްނާން ޕްރޮވިންސްގެ އުފެއްދުންތައް ރާއްޖެ ގެނެސް ވިއްކުމަށް މަގުފަހިކުރުމެވެ.

މި ފޯރަމްގައި ވާހަކަދައްކަވަމުން އެމްއެންސީސީއައިގެ ރައީސް ޝަހްމީދު އަބްދުﷲ ވިދާޅުވީ ރާއްޖެ އާއި ޗައިނާ ގުޅުން ބިނާވެފައިވަނީ އިތުބާރާއި އިހުތިރާމް އަދި ކުރިއެރުމާއި ތަރައްގީއަށް އޮތް ޝައުގުވެރިކަމުގެ ސަބަބުން ކަމަށެވެ. އަދި މި ފޯރަމްގެ ސަބަބުން ދެ ގައުމުގެ ގުޅުން އިތުރަށް ވަރުގަދަވެ، ވިޔަފާރީގެ ގޮތުން ފަހި ފުރުސަތުތަކެއް ލިބިގެންދާނެ ކަމަށް ޝަހްމީދު ވިދާޅުވިއެވެ.

ޗައިނާގެ ޔުއްނާން ޕްރޮވިންސަކީ އެ ގައުމުގެ އެންމެ ވަރުގަދަ އެއް އެގްރިކަލްޗަރަލް އެއް ހަބެވެ. އެގޮތުން ޔުއްނާން ޕްރޮވިންސްގެ އުފެއްދުންތަކުގައި ސައިފަތް، ކޮފީ، ތަރުކާރި، މޭވާ، ނަޓްސް، މާ، ފަތްޕިލާވެލީގެ ބޭސް، އަދި ފާމިންގ ޕްރޮޑަކްޓްސް ހިމެނެ އެވެ.

މި ފޯރަމްގައި ސީސީޕީއައިޓީގެ ޔުއްނާން ޕްރޮވިންސްގެ ޗެއަރމަން ލިއު ޝިންލިން ވަނީ އެ ޕްރޮވިންސްގެ އުފެއްދުންތަކުގެ ކޮލިޓީ ޔަގީންކޮށްދެއްވައި، މި ތަކެއްޗާއި ބެހޭ މައުލޫމާތު ހިއްސާކޮށްދެއްވާފައެވެ. އަދި އެ ޕްރޮވިންގެ ގުދުރަތީ މާހައުލްގެ ސަބަބުން އެތަނުގައި ހެދޭ ތަކެއްޗަކީ ދުނިޔޭގެ އެހެން ތަންތަނައި ބަލާއިރު، ތަފާތު ޕްރޮޑަކްޓްސް ތަކެއްކަން ޝިންލިން ފާހަގަކުރެއްވިއެވެ.

ތޮއްޑޫ ކައުންސިލްގެ ރައީސް އަދި ގެސްޓް ހައުސް އެސޯސިއޭޝަންގެ ބޯޑް މެންބަރު އަހްމަދު ކަރަމް ވަނީ މި ފުރުސަތުގެ ބޭނުން ހިފައި، ރާއްޖޭގައި މި ޕްރޮޑަކްޓްތައް ވިއްކުމުގެ ފުރުސަތުތައް ފުޅާކުރުމަށް ގޮވާލާފައެވެ. އޭނާ ވަނީ މި ތަކެތި ޔުއްނާން ޕްރޮވިންސް އިން އެތެރެކޮށް، ރާއްޖޭގެ މާކެޓަށް ނެރުމުން ކަސްޓަމަރުންނަށް އަތްފޯރާ ފަށެއްގައި އަދި ހެޔޮ އަގެއްގައި ރަނގަޅު ކޮލިޓީގެ ޕްރޮޑަކްޓްސް ލިބޭނެ ކަމަށް ވިދާޅުވެފައެވެ.

މި ފޯރަމް ނިންމާލުމުގެ ކުރިން ވަނީ ދެ ގައުމުގެ ވިޔަފާރިވެރިން މަޝްވަރާކޮށް، ޗައިނާ އިން ރާއްޖެއަށް އިމްޕޯޓް ކުރެވިދާނެ ތަފާތު މުދާތަކާއި ޕްރޮޑަކްޓްތަކުގެ މައުލޫމާތު ބަދަލުކުރުމުގެ ފުރުސަތު ދީފައެވެ. މި ފޯރަމްގެ ސަބަބުން ރާއްޖޭގެ މާކެޓަށް ޗައިނީޒް ޔުއްނާން ޕްރޮވިންސްގެ ތަފާތު އުފެއްދުންތައް އެތެރެކުރުމަށް ފަހި ފުރުސަތުތަކެއް ހުޅިވިގެންދާނެ ކަމަށް ގަބޫލް ކުރެވެއެވެ.