ތިން އަހަރު ތެރޭ ރަނުގެ އަގު 1800 އިން 3900 ޑޮލަރަށް އުފުލުން، ގިނަ ސަބަބުތަކެއް އެބަހުރި
Read Time:5 Minute, 1 Second
ފާއިތުވެދިޔަ ތިން އަހަރު ތެރޭގައި ދުނިޔޭގެ ބާޒާރުގައި ރަނުގެ އަގު ވަރަށް ބޮޑަށް މަތިވެ، މިހާތަނަށް ރެކޯޑު ކުރެވިފައިވާ އެންމެ މަތީ އަގަށް ވަނީ އަރައިފައެވެ.
ރަނަކީ ފައިސާ ރައްކާތެރިކުރުމުގެ ”ސޭފް ހޭވެން“ އެއް ކަމަށް ދެކި، ގިނަ ބަޔަކާއި ޤައުމުތަކަކުން ވަނީ ފައިސާ ރައްކާ ކުރުމަށް ރަނަށް އިންވެސްޓް ކޮށްފައެވެ.
މިގޮތުން، 2022 ވަނަ އަހަރު ރަން އައުންސެއްގެ އަގު ހުރީ ގާތްގަނޑަކަށް 1,800 އާއި 2,000 ޑޮލަރުގެ ކައިރީގަ އެވެ. ނަމަވެސް 2025 ވަނަ އަހަރާ ހަމައަށް އައި އިރު، ރަން އައުންސެއްގެ އަގު މިވަނީ 3,900 އާއި 4,000 ޑޮލަރާ ދެމެދަށް އަރާފައެވެ. މިއީ ތިން އަހަރުގެ ކުރިން ހުރި އަގަށް ވުރެ ރަނުގެ އަގު ދެގުނަ އިތުރު އަގެކެވެ.
ރަން އަގުތައް މަތިވުމުގެ މައިގަނޑު ސަބަބުތައް:
- އިޤްތިޞާދީ ނުތަނަވަސްކަން: ރަންގެ އަގު މަތިވުމުގެ އެންމެ ބޮޑު އެއް ސަބަބަކީ ދުނިޔޭގެ އިޤްތިޞާދަށް ކުރިމަތިވެފައިވާ ނުތަނަވަސްކަމެވެ. ފައިސާގެ މުސްތަޤްބަލާ މެދު އިންވެސްޓަރުންނާއި އާންމުންގެ ހިތްތަކުގައި ޔަގީންކަމެއް ނެތުމާއެކު، ރަނަށް އިންވެސްޓް ކުރުން އިތުރުވެއެވެ.
- ހަނގުރާމަތަކާއި، ސިޔާސީ މައްސަލަތައް: ދުނިޔޭގެ ޖިއޯޕޮލިޓިކަލް ހާލަތު ނުތަނަވަސްވުމުގެ ސަބަބުން އިންވެސްޓަރުންނާއި ޤައުމުތަކުން ރަން ގަންނަލެއް އިތުރުވެއެވެ. ފައިސާގެ އަގު ދަށްވުމުގެ ނުރައްކަލާއި އިޤްތިޞާދީ ގޮންޖެހުންތަކުގެ ބިރު އޮތް ހާލަތްތަކުގައި ރަނަކީ ”ސޭފް ހޭވެން“ އެއް ކަމަށް ބެލެވެ އެވެ.
- އިންޓަރެސްޓް ރޭޓުތައް ދަށްވުން: ރަނުގެ އަގު މަތިވުމުގެ އަނެއް ސަބަބަކީ ގިނަ ޤައުމުތަކުގައި އިންޓަރެސްޓް ރޭޓުތައް ދަށަށް ދިއުމެވެ. ބޭންކުތަކުން ދައްކާ އިންޓަރެސްޓް މަދުވާނަމަ، ރަން ގަނެގެން ފައިސާ ރައްކާކުރުން އިތުރަށް މުހިންމުވެ އެވެ. އަދި އެމެރިކާ ޑޮލަރުގެ އަގު ދަށްވާނަމަ، ރަނުގެ އަގު އާންމުކޮށް މަތިވެ އެވެ. އެއީ ރަނުގެ އަގު ކަނޑައަޅަނީ ޑޮލަރަށް ކަމަށް ވާތީ އެވެ.
- ސެންޓްރަލް ބޭންކުތަކުން ރަން ގަތުން: ޚާއްސަކޮށް އޭޝިއާގެ ގިނަ ސެންޓްރަލް ބޭންކުތަކުން ވަނީ އެމެރިކާ ޑޮލަރަށް ބަރޯސާވުން ކުޑަކުރުމުގެ ގޮތުން ގިނަ އަދަދެއްގެ ރަން ގަނެފަ އެވެ. މިކަމުގެ ސަބަބުން ވެސް ރަންގެ އަގުތައް މަތިވުމަށް ވަނީ ބާރު އަޅާފަ އެވެ.
- ސަޕްލައި މަދުވުމާއި ޑިމާންޑް ގިނަވުން: ރަނުގެ ސަޕްލައި މަދުވުމަކީ ވެސް އަގު މަތިވާ މުހިންމު ސަބަބެކެވެ. ރަން މައިން ކުރުމަކީ ވަގުތު ނަގާ އަދި ގިނަ ހޭދަތަކެއް ކުރަންޖެހޭ ކަމެކެވެ. އިންވެސްޓަރުންނާއި، ޤައުމުތަކާއި، ކުންފުނިތަކުން ރަން ގަތުމަށް އެދޭ މިންވަރު އިތުރުވަމުންދާ ވަރަކަށް، ރަނުގެ އަގު މަތިވަމުންދާނެއެވެ.
މާކެޓް އެނަލިސްޓުން ބަލާ ގޮތުގައި، ދުނިޔޭގެ ހާލަތު މިވަގުތު އޮތްގޮތާއި، ފައިސާގެ އަގު ދަށްވަމުން އަންނަނަމަ، ރަނުގެ އަގު އިތުރަށް މަތިވެގެން ދިއުމަކީ އެކަށީގެންވާ ކަމެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %