ކަރަންޓު މީޓަރުތައް ސެޕްޓެމްބަރުގެ ނިޔަލަށް ސްމާޓް މީޓަރަށް ބަދަލު ކުރަނީ
Read Time:3 Minute, 6 Second
ސްޓެލްކޯގެ ހުރިހާ ކަރަންޓު މީޓަރެއް އަންނަ ސެޕްޓެމްބަރު މަހުގެ ނިޔަލަށް ސްމާޓް މީޓަރަށް ބަދަލުކޮށް ނިންމާލެވޭނެ ކަމަށް އެކުންފުނީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ ސްޓެލްކޯއިން ޒަމާނީ ހިދުމަތްތައް ފޯރުކޮށްދީ، ކުންފުންޏާމެދު އޮންނަ އިތުބާރު އިތުރުކުރުމަށްޓަކައި ކުރަމުންދާ މަސައްކަތްތަކުގެ ތެރެއިން، ހުޅުމާލޭގެ ދެވަނަ ފިޔަވަހީގައި ސްމާޓް މީޓަރު ހަރުކުރެވި، ސްމާޓް އެޕްލިކޭޝަން ކަސްޓަމަރުންނަށް ތައާރަފުކުރުމަށް ބޭނުންވާ އެންމެ ފަހުގެ ތައްޔާރީތައް ވަމުން އަންނަ ކަމަށެވެ.
އަދި ސެޕްޓެމްބަރު މަހުގެ ނިޔަލަށް ސްޓްލްކޯގެ ހުރިހާ ކަސްޓަމަރުންގެ މީޓަރުތައް ސްމާޓް މީޓަރަށް ބަދަލު ކުރެވިގެންދާނެ ކަމަށާއި ސްމާޓް މީޓަރުގެ މި ސްމާޓް އެޕްލިކޭޝަނާއެކު، ކަސްޓަމަރުންނަށް މީޓަރުގެ މައުލޫމާތު ފެނި، ގަޑިއިރަކަށް، ދުވާލަކަށް އަދި ހަފްތާއަކަށް ކަރަންޓު ބޭނުންކުރެވޭ މިންވަރު ވެސް ފެންނަމުންދާނެ ކަމަށް ފަހުމީ މި ޕޯސްޓްގަައި ވިދާޅުވެފައިވެއެވެ.
ސްމާޓް މީޓަރު ހަރުކުރެވި ބޭނުން ކުރެވެން ފެށުމާއެކު ކަސްޓަމަރުންނަށް ކަރަންޓު ބޭނުން ކުރެވޭ މިންވަރު ބަލައި، ކަރަންޓަށް ކުރާ ހަރަދު ކުޑަ ކުރަން ކަސްޓަމަރުންނަށް ފަސޭހަ ވެގެން ދާނެ ކަމަށް ވެސް ފަހުމީ ފާހަގަ ކުރައްވާފައި ވެއެވެ.
މި ފަހަކަށް އައިސް ކަރަންޓު ބިލް ބޮޑުވާ މައްސަލަ ވަނީ އިތުރު ވެފައެވެ. އެގޮތުން ބައެއް މަސް މަހުގައި ބައެއް ގެތަކަށް އަންނަ ބިލު ވަނީ އާންމުކޮށް އަންނަ ވަރަށް ވުރެއް ދެގުނަ އަދި ތިން ގުނަ ވެސް އިތުރު ވެފައެވެ. ސްމާޓް މީޓަރު ހަރުކުރުމާއެކު މިކަން ކަން ހައްލު ވެގެން ދާނެ ކަމަށް ބެލެވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %