ކަސްޓަމްސްއަށް ލިބެންޖެހޭ 477 މިލިޔަން ރުފިޔާ ނުލިބޭ: އޮޑިޓު ރިޕޯޓް

Read Time:4 Minute, 33 Second

މޯލްޑިވްސް ކަސްޓަމްސް ސާވިސްއަށް ލިބެންޖެހޭ އާމްދަނީގެ ތެރެއިން، 2022 ވަނަ އަހަރުގެ ނިޔަލަށް 477 މިލިޔަން ރުފިޔާ ނުލިބިވާކަމަށް އޮޑިޓަރ ޖެނެރަލް އޮފީހުން ނެރެފައިވާ އޮޑިޓް ރިޕޯޓަކުން ހާމަވެއްޖެއެވެ. މި ފައިސާގެ ތެރެއިން ބޮޑުބައެއް ހިއްސާ ކުރަނީ އިމްޕޯޓް ޑިއުޓީގެ ގޮތުގައި ނުލިބިވާ ފައިސާއެވެ.

އޮޑިޓަރ ޖެނެރަލް އޮފީހުން ހެދި މޯލްޑިވްސް ކަސްޓަމްސް ސާވިސްގެ 2020، 2021، އަދި 2022 ކޮމްޕްލަޔަންސް އޮޑިޓް ރިޕޯޓުގައިވާ ގޮތުން ކަސްޓަމްސް މެދުވެރިކޮށް ލިބެންޖެހޭ އާމްދަނީގެ ތެރެއިން ގިނަ އަދަދެއްގެ ފައިސާ މިހާތަނަށް ލިބިފައި ނުވެއެވެ. އަދި މި އަދަދު އަހަރުން އަހަރަށް އިތުރުވަމުންދާކަމަށް އޮޑިޓް ރިޕޯޓްގައި ވަނީ ފާހަގަކޮށްފައެވެ.

އޮޑިޓަރ ޖެނެރަލް އޮފީހުން އާންމު ކޮށްފައިވާ ތަފާސް ހިސާބުތަކަށް ބަލާއިރު، 2022 އަހަރުގެ ނިޔަލަށް ނުލިބިވާ ފައިސާގެ ޖުމްލަ 477،915،625 ރުފިޔާއަށް އަރައެވެ. އޭގެ ތެރެއިން %83.3 ރުފިޔާއަކީ އިމްޕޯޓް ޑިއުޓީގެ ގޮތުގައި ނުލިބޭ ފައިސާއެވެ. މީގެ އިތުރުން ޖޫރިމަނާ ގޮތުގައި 77،226،371 ރުފިޔާ ނުލިބިވާކަމަށް ފާހަގަ ކޮށްފައިވެއެވެ. އާމްދަނީގެ ގޮތުގައި ލިބެންޖެހޭ ފައިސާގެ ތެރެއިން 2022 ވަނަ އަހަރުގެ ނިޔަލަށް ނުލިބިވާ ފައިސާގެ ތެރެއިން 322،676،331 ރުފިޔާއަކީ 3 އަހަރަށް ވުރެއް ގިނަދުވަސްވެފައިވާ ފައިސާއެވެ.

މިގޮތުން ފައިސާ ހޯދުމަށް ކަސްޓަމްސްގެ ޤާނޫނާއި ގަވައިދުގެ ތެރެއިން އަޅަންޖެހޭ ފިޔަވަޅު އަޅާފައިވާ ކަަމަށް ބުނެފައިވެއެވެ. ނަމަވެސް ފައިސާ ހޯދުމަށް އެ އިދާއިރާއަށް ހުރި ގޮންޖެހުންތަކުގެ ތެރެއިން ކޯޓުން ހުކުމް ކުރުމަށް ފަހު ތަންފީޒު ނުވެ ފައިސާ ނުލިބިހުރިކަން ފާހަގަ ކޮށްފައިވެއެވެ. އަދި ފައިސާ ހޯދުމަށް ޝަރީއަތައް ހުށަހެޅުމާއި ގޮތެއް ނުނިމި މައްސަލަ ދިގުލައިގެން ގޮސްފަވާ ކަމަށް އޮޑިޓް ރިޕޯޓުގައި ވަނީ ފަހާގަ ކޮށްފައެވެ. ޝަރީއަތުން ގޮތް ނުނިމި ހުރި މައްސަލަތަކުން ލިބެންޖެހޭ 160،674،686 ރުފިޔާ ހިމެނެއެވެ. މީގެ އިތުރުން ކަސްޓަމްސްގެ ޤަވައިދުގައިވާ ގޮތަށް، ރާއްގެ އެތެރެކުރެވޭ މުދަލުގައި ގިނަދުވަސް ވެގެން ނެގޭ ޖޫރިމަނާ ފައިސާގެ ގޮތުގައި 2022 ވަނަ އަހަރު އެކަނިވެސް 225،975،902 ރުފިޔާ ނުލިބެއެވެ.

އޮޑިޓަރ ޖެނެރަލް ވަނީ މިކަންކަން އިސްލާހު ކުރުމަށް ކަމާގުޅޭ އިދާރާތަކާއި މަޝްވަރާކޮށްގެން ކުރިއަށް ގެންދިއުމަށް ލަފާދީފައެވެ. އަދި ނުލިބިވާ ފައިސާ ހޯދުމަށް ތަންފީޒީ ހަރުދަނާ ފިޔަވަޅުތަކެއް އެޅުމަށް އިދާރާތަކާއި އެކު މަސައްކަތް ކުރުމަސްވެސް އޮޑިޓާރ ޖެނެރަލުން ކަސްޓަމްސްއަށް ލަފާދީފައިވެއެވެ.