އެމްޕީއެލްގެ ބޮންޑެޑް ވެއާހައުސްތަކުގެ ލީސް ފީ ބޮޑުކުރަނީ
Read Time:3 Minute, 48 Second
އަންނަ މަހުގެ 15 އިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ބޮންޑެޑް ވެއާހައުސްތަކުގެ ލީސް ފީ ބޮޑުކުރަން ނިންމައިފިއެވެ.
އެމްޕީއެލް އިން ކުރި އިއުލާނެއްގައި ބުނެފައިވަނީ އަންނަ އޮގަސްޓް މަހުގެ 15 އިން ފެށިގެން ހުޅުމާލެ ބޮންޑެޑް ވެއާހައުސްތަކުގެ 1، 2 އަދި 3 ވަނަ ސަރަހައްދުގެ ފީ ތަކަށް ބަދަލު ގެނެސްފައިވާ ކަމަށެވެ.
އެގޮތުން ޖީއެސްޓީ ހިމަނައިގެން 20 ފޫޓުގެ ކޮންޓެއިނަރަކަށް މަހެއްގެ މައްޗަށް 1،134 ޑޮލަރު ދައްކަން ޖެހޭ ގޮތަށް ބަދަލުގެނައި އިރު 40 ފޫޓުގެ ކޮންޓެއިނަރަކަށް މަހަކަށް ދެން ދައްކަން ޖެހޭނީ 2،268 ޑޮލަރެވެ.
މިއީ ފާއިތުވި ދެ އަހަރުގެ ތެރޭގައި ބޮންޑެޑް ވެއާހައުސްގެ ލީސް ފީ ބޮޑު ކުރި ދެވަނަ ފަހަރެވެ. 2024 ވަނަ އަހަރުގެ ޖުލައި މަހާއި ހަމައަށް 20 ފޫޓުގެ ކޮންޓެއިނަރަކަށް އެއް މަސް ދުވަހުގެ ފީ އަކަށް ނެގީ 442 ޑޮލަރެވެ. އަދި 40 ފޫޓުގެ ކޮންޓެއިނަރެއް ބެހެއްޓުމަށް ނަގަމުންދިޔައީ 884 ޑޮލަރެވެ.
މިދިޔަ އަހަރުގެ ޖުލައި މަހުގައި މި އަގުތައް ވަނީ 20 ފޫޓުގެ ކޮންޓެއިނަރަކަށް 550 ޑޮލަރު އަދި 40 ފޫޓުގެ ކޮންޓެއިނަރަކަށް 1،100 ޑޮލަރަށް ބޮޑު ކޮށްފައެވެ.
ބޮންޑެޑް ވެއާހައުސްގެ ފީ އަލުން ބޮޑު ކުރުމާއި ގުޅިގެން އެމްޕީއެލް އިން ބުނީ ބޮންޑެޑް ވެއާހައުސްގެ ހިދުމަތް ފޯރުކޮށްދެނީ 24 ގަޑިއިރުގެ ސެކިއުރިޓީއާއެކު ކަމަށާއި އެ ސަރަހައްދުގައި މޯލްޑިވްސް ކަސްޓަމްސްގެ ހިދުމަތްތައް ފޯރުކޮށްދިނުމަށް ކަސްޓަމްސްގެ ފެސިލިޓީއެއް ވެސް ހުންނާނެ ކަމަށެވެ. އަދި މުދާ ލޯޑް ކުރުމާއި އަންލޯޑް ކުރުމަށް ފަސޭހަ ވެގެން ދާނެ ކަމަށާއި، އެސަރަހައްދުގެ މެއިންޓެނަންސް ބަލަހައްޓައި، ކުނި އުކާލަން ވޭސްޓް ޑިސްޕޯސަލްގެ ހިދުމަތްވެސް ފެށިގެން ދާނެކަމަށެވެ.
މީގެ އިތުރުން އެ ކުންފުނިން ވަނީ ބޮންޑެޑް ވެއާހައުސް އޭރިޔާ 1، 2 އަދި 3 ގައި ބޮންޑް ކުރަނީ ރިސޯޓްތަކަށް ގެންނަ ބަނގުރަލާއި އޫރު މަހުގެ ބާވަތްތައް ކަން ފާހަގަކޮށް، ހުޅުމާލެ ބޮންޑެޑް ވެއާހައުސްގެ ލީސް ފީތަކަށް ގެނައި ބަދަލުތަކާއި ގުޅިގެން އާންމު މުދަލުގެ އަގުތަކަށް ބާޒާރުގައި ބޮޑުވާނެ ސަބަބެއް ނެތް ކަން ފާހަގަ ކޮށްފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %