ސާކްގެ ޤައުމުތަކުން ދިރިއުޅުމުގެ ޚަރަދު އެންމެ ބޮޑު ޤައުމަކަށް ދިވެހިރާއްޖެ
Read Time:3 Minute, 44 Second
އެންމެފަހުގެ މައުލޫމާތުތަކަށް ބަލާއިރު، ދިވެހިރާއްޖެއަކީ ސާކް ގައުމުތަކުގެ ތެރެއިން ދިރިއުޅުމަށް އެންމެ އަގުބޮޑު ގައުމުކަން ހާމަވެއްޖެއެވެ. މި މައުލޫމާތުތައް ދައްކާ ގޮތުގައި، ކުލި ނުހިމަނައި، ކޮންމެ މީހަކަށް މަހެއްގެ މައްޗަށް އެވްރެޖްކޮށް 840 އެމެރިކާ ޑޮލަރު (ގާތްގަނޑަކަށް 13،000 ރުފިޔާ) ޚަރަދުވެއެވެ.
އެތައް ބަޔަކު ކުއްޔަށް ދިރިއުޅޭއިރު، ކުލީގެ ޚަރަދު ހިމަނައިފިނަމަ، ދިރިއުޅުމުގެ ޚަރަދު ދެގުނަ އަދި ތިންގުނައަށް ވެސް އިތުރުވެދާނެއެވެ. ސަބަބަކީ، ސަރަހައްދުގެ އެހެން ގައުމުތަކާ އަޅާބަލާއިރު އެންމެ ބޮޑު ކުއްޔެއްވެސް ދައްކަން ޖެހެނީ ރާއްޖޭގައި ކަމަށް ވާތީއެވެ.
އެވްރެޖްކޮށް ކައިވެނިކޮށްގެން އުޅޭ ދެމަފިރިއެއްގެ ވާހަކަ ދައްކާނަމަ، ގިނަފަހަރު ދެމީހުން ވެސް އުޅެެނީ ވަޒީފާއަށް ގޮސްގެންނެވެ. ދެމީހުން މަސައްކަތްކޮށްގެން ލިބޭ މުސާރައިން ދައްކާލެވެނީ ހަމައެކަނި ކުއްޔާއި ބިލްތަކާއި ދުވަހުގެ ހަރަދުތަކެވެ.
ކާބޯތަކެތީގެ އަގުތައް ވެސް ދަނީ ބޮޑުވަމުންނެވެ. މިއީ މިހާރު ވެސް ދިރިއުޅުމުގެ ބޮޑު ޚަރަދާ ކުރިމަތިލާން ޖެހިފައިވާ އާންމު ރައްޔިތުންނަށް އިތުރު ބުރައެކެވެ. މޭވާއާއި ތަރުކާރީގެ އިތުރުން އެހެނިހެން އިމްޕޯޓްކުރާ މުދަލުގެ އަގުތައް މިދިޔަ މަސްތަކުގައި ވަނީ ފާހަގަކުރެވޭ މިންވަރަކަށް ބޮޑުވެފައެވެ. މިއީ ގިނަ އާއިލާތަކަށް ކާބޯތަކެތި ގަތުމަށް ކުރާ ޚަރަދު އިތުރުކުރާ ކަމެކެވެ.
ސާކް ސަރަހައްދުން ދެވަނައަށް އެންމެ އަގުބޮޑު ގައުމަކީ ސްރީލަންކާއެވެ. އެގައުމުގައި ކޮންމެ މީހަކަށް މަހެއްގެ މައްޗަށް އެވްރެޖްކޮށް 507 އެމެރިކާ ޑޮލަރު ޚަރަދުވެއެވެ. އަނެއްކޮޅުން، އިންޑިއާއަކީ ސާކް ގައުމުތަކުގެ ތެރެއިން އެންމެ އަގުހެޔޮ ގައުމެވެ. އެގައުމުގައި ކޮންމެ މީހަކަށް މަހެއްގެ މައްޗަށް 313 އެމެރިކާ ޑޮލަރާއެކު ދިރިއުޅެވޭކަން ވަނީ ހާމަވެފައެވެ.
ދިރިއުޅުމުގެ ޚަރަދުތައް އާމްދަނީއަށްވުރެ ބޮޑުވެ، ދެގައުމު ދެމެދުގައިވާ މި ބޮޑު ތަފާތުތަކުން ދައްކައިދެނީ ދިވެހިރާއްޖޭގެ އާންމު ރައްޔިތުންނަށް ކުރިމަތިވަމުންދާ އިގްތިސާދީ ދަތިކަމެވެ.
Happy
0 %
Sad
0 %
Excited
100 %
Sleepy
0 %
Angry
0 %
Surprise
0 %