ޓްރޭޑްމާކް ބިލްގެ ސަބަބުން ރާއްޖޭގެ ވިޔަފާރިއަށް އިންވެސްޓަރުންގެ ޝައުގުވެރިކަން އިތުރުވާނެ: މިނިސްޓަރ ސައީދު

Read Time:4 Minute, 47 Second

ރައްޔިތުންގެ މަޖިލީހަށް ހުށަހަޅާފައިވާ ޓްރޭޑްމާކް ބިލުގެ ސަބަބުން ރާއްޖޭގެ ވިޔަފާރިއަށް އިންވެސްޓަރުންގެ ޝައުގުވެރިކަން އިތުރުވާނެ ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުހައްމަދު ސައީދު ވިދާޅުވެއްޖެއެވެ.

ޓްރޭޑްމާކާއި ބެހޭ ބިލުގައި ވާގޮތުން ރާއްޖޭގައި ރަޖިސްޓަރ ކުރާ ޓްރޭޑްމާކް އެއްގެ ހުއްދައާއި ނުލައި އެ ޓްރޭޑްމާކާއި އެއްގޮތް ނުވަތަ ވައްތަރު އެހެން ނިޝާނެއް، ނުވަތަ އެ ޓްރޭޑްމާކަށް ނިސްބަތްވާ މުދަލެއް ނުވަތަ ހިދުމަތާއި އެއްގޮތް އެއްޗެއް ވިޔަފާރީގައި އޮޅުން އަރާނެފަދަ ހާލަތެއްގައި އެ ނިޝާނެއް ބޭނުންކުރުން ހުއްޓުވުމުގެ ހައްގު ޓްރޭޑްމާކް ރަޖިސްޓްރީ ކުރާ ފަރާތައް ލިބޭނެއެވެ.

އަދި މިފަދަ ކަމެއް ސާބިތުވާނަމަ އެ ޓްރޭޑްމާކެއްގެ ވެރިފަރާތައް ލިބުނު ގެއްލުމުގެ ބަދަލު ނަގައިދޭން ކޯޓަށް ކަނޑައަޅައި، ޓްރޭޑްމާކާ ގުޅޭ ހައްގަށް އަރައިގަތުން ހުއްޓުވައި އެ ހައްގުތައް އަނބުރާ ހޯދަން ހިނގާ ހަރަދު ހޯދައިދޭންވެސް ކަނޑައެޅިދާނެ ކަމަށް ބިލުގައި ވެއެވެ.

މީގެ އިތުރުން މި ބިލުގައި ރާއްޖޭގައި ކައުންޓަރފީޓްކުރުން ނުވަތަ ޓްރޭޑްމާކް ކުރެވޭ މުދަލުގެ ނަކަލުތައް ރާއްޖެއަށް އެތެރެކުރުމާއި ވިއްކުމާއި ބޭރުކުރުންވެސް ވަނީ މަނާކޮށްފައެވެ. މިފަދަ އަމަލެއް ކޮށްފި މީހަކަށް 100،000 ރުފިޔާ އާއި 2000،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

އެކްސްގައި ކުރެއްވި ޕޯސްޓެއްގައި ސައީދު ވިދާޅުވީ ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅި ޓްރޭޑްމާކާއި ބެހޭ ބިލަކީ ނުގެނެވި ލަސްވެފައިވާ ބިލެއްކަމަށާއި، ދިވެހިރާއްޖޭގެ ވިޔަފާރީގެ މާހައުލު ހަރުދަނާކޮށް އިތުބާރުއުފެއްދުމަށް ނުހަނު ބޭނުންތެރި އަދި މުހިއްމު ބިލެއް ކަމަށެވެ.

“ ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅި ޓްރޭޑްމާރކާއި ބެހޭ ބިލަކީ ނުގެނެވި ލަސްވެފައިވާ، ދިވެހިރާއްޖޭގެ ވިޔަފާރީގެ މާހައުލު ހަރުދަނާކޮށް އިތުބާރުއުފެއްދުމަށް ނުހަނު ބޭނުންތެރި އަދި މުހިއްމު ބިލެއް. މި ޤާނޫނު ވުޖޫދަށް އައުމުން ދިވެހިރާއްޖޭގެ ވިޔަފާރީގެ މާޙައުލަށް ވިޔަފާރިތަކުންކުރާ އިތުބާރު އިތުރުކޮށްދީ، ފިކުރީމުދަލުގެ ހައްޤުތައް ރައްކާތެރިކޮށްދިނުމަށް ސަރުކާރުން ދޭ އަހްމިއްޔަތު ހާމަކޮށްދޭ، އަދި މިއީ ރާއްޖޭގައި އިންވެސްޓުކުރާ ފަރާތްތަކުގެ ޝައުޤުވެރިކަން ހޯދުމަށްވެސް މުހިއްމު ބިލެއްކަން ފާހަގަ ކޮށްލަން“

މި ބިލަކީ 2040 ވަނަ އަހަރާ ހަމައަށް ރާއްޖެއަކީ ތަރައްގީވެފައިވާ ގައުމަކަށް ހެދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ތަސައްވުރުގައި މުހިންމު ފިޔަވަޅެއް ކަމަށް ސައީު ވިދާޅުވިއެވެ.