ނޭޕާލްގެ މުޒާހަރާ ހޫނުވެ ބޮޑުވަޒީރު ވެސް އިސްތިއުފާ ދީފި، އަދިވެސް ގައުމު ހަލަބޮލި

Read Time:4 Minute, 17 Second

ނޭޕާލްގައި މުޒާހަރާތައް ފެށިގެން އައީ ފޭސްބުކް، ވަޓްސްއެޕް، އިންސްޓަގްރާމް، އެކްސް (ޓްވިޓާ)، އަދި ޔޫޓިއުބް ފަދަ 26 ސޯޝަލް މީޑިއާ ޕްލެޓްފޯމެއް ސަރުކާރުން މަނާކުރުމުންނެވެ.

މި ސެޕްޓެމްބަރު މަހުގެ ހަތަރު ވަނަ ދުވަހު އާ ގާނޫނެއްގެ ދަށުން ސޯޝަލް މީޑިއާ ޕްލެޓްފޯމްތައް ރަޖިސްޓްރީކޮށްފައި ނުވާތީ ސަރުކާރުން ވަނީ އެ މީޑިއާތައް މަނާކޮށްފައެވެ. މިކަމުގެ ސަބަބުން ގިނަ ޒުވާނުން ވަނީ ނުރުހުން ފާޅުކޮށް މަގުތަކަށް ނިކުމެފައެވެ. ހާއްސަކޮށް ސޯޝަލް މީޑިއާ އަކީ އެމީހުންގެ ދިރިއުޅުމުގެ ބޮޑު ބައެއް ކަމަށް ވާތީ އެތައްބަޔަކު ވަނީ މުޒާހަރާ ކުރަންފަށާފައެވެ. މީގެ އިތުރުން ސަރުކާރުގައި ޒަމާނުއްސުރެ ހިންގަމުން އައި ކޮރަޕްޝަނާއި ބާރުގެ ބޭނުން ނުހައްގުން ކުރުމާއި ދެކޮޅަށް ވެސް ވަނީ އަޑު އުފުލަން ފަށާފައެވެ.

ގިނަ އަދަދެއްގެ މުޒާހަރާގެ ބައިވެރިން ވަނީ ކަތުމަންޑޫ އާއި އެހެނިހެން ސިޓީތަކުގެ މަގުތައް ފުރާލާފައެވެ. އަދި ސޯޝަލް މީޑިއާ މަނާކުރުން އުވާލުމަށް ގޮވާލައި، ސިޔާސީ އިސްލާހުތައް ގެނައުމަށް ގޮވަމުން އެމީހުން ވަނީ އެގައުމުގެ މަޖިލީހާއި ސަރުކާރު އޮފީސްތައް ކައިރިއަށް އެއްވެފައެވެ.

އެގައުމުގެ ސަލާމަތީ ބާރުތަކުން އެމީހުން ހުއްޓުވަން ކުރި މަސައްކަތުގައި ވަނީ ކަރުނަ ގޭހާއި ފެނާއި ރަބަރު ވަޒަން އަދި ފަހުން ލައިވް ވަޒަން ވެސް ބޭނުންކޮށްފައެވެ. އެންމެ ފަހުން މުޒާހަރާ ހޫނުވެ 19 މީހުން މަރުވިއިރު، 100 އަށް ވުރެ ގިނަ މީހުން ވަނީ ޒަޚަމްވެފައެވެ.

ނޭޕާލް ސަރުކާރުން ވަނީ ގައުމު ކޮންޓްރޯލް ކުރުމަށް ސޯޝަލް މީޑިއާ ބޭނުންކުރުން މަނާކުރުމުގެ ގާނޫނު އަނބުރާ ގެންގޮސް އެ ގަވައިދު އުވާލާފައެވެ. އަދި ގިނަ މިނިސްޓަރުންތަކެއް ވަނީ އިސްތިއުފާ ދީފައެވެ. ނަމަވެސް ކޮންޓްރޯލް ނުވުމުގެ ސަބަބުން މިއަދު ވަނީ އެގައުމުގެ ބޮޑުވަޒީރު ކޭ.ޕީ ޝަރްމާ އޮލީ ވެސް އިސްތިއުފާ ދީފައެވެ.

މި ފިޔަވަޅުތަކަށްފަހުވެސް މުޒާހަރާތައް ކޮންޓްރޯލް ނުވެ، މުޒާހަރާގެ ބައިވެރިން ވަނީ ސަރުކާރުގެ އިމާރާތްތަކުގައި ހުޅުޖަހާފައެވެ. އޭގެ ތެރޭގައި މަޖިލީހާއި ބޮޑުވަޒީރުގެ އޮފީސް ވެސް ހިމެނެ އެވެ. އަދި ބައެއް ސިޔާސީ މީހުންގެ ގެތަކާއި ލޯކަލް ކޯޓުގޭތަކުގައި ވެސް ވަނީ އަލިފާން ރޯކޮށްލާފައެވެ. ބައިރަހަވާގައި މުޒާހަރާގެ ބައިވެރިން ވަނީ އެއާޕޯޓަށް ވެސް ގެއްލުން ދީފަ އެވެ. ހާލަތު ގޯސްވެ، ގިނަ ސަރަހައްދުތަކެއްގައި ކާފިއު އިއުލާން ކޮށްފައެވެ.