ޤައުމި ޤުރުއާން މުބާރާތުގެ ރަންވަނަތައް ޝާޔާ، ޝަބާ އަދި ޝައިމަށް
Read Time:4 Minute, 12 Second
ޤުރުއާން ކިޔެވުމުގެ 37ވަނަ ޤައުމީ މުބާރާތުގެ ރަން ވަނަތައް، މިއަހަރު ފާޠިމަތު ޝާޔާ ޒާހިރު، ޢާއިޝަތު ޝަބާ އަދި އަޙްމަދު ޝައިމް ރިޟާ ހާސިލްކޮށްފިއެވެ.
ރާއްޖޭގެ އެކި ކަންކޮޅުތަކުން އެތައް ބައިވެރިންނެއް ބައިވެރިވި މި މުބާރާތަކީ ކޮންމެ އަހަރަކު ވެސް ބޮޑު ތަރުހީބެއް ލިބޭ މުބާރާތެކެވެ. މި މުބާރާތުގެ ޝަރަފުވެރި ވަނަތަކަށް ދިޔަ ބައިވެރިންނަށް އިނާމު ޙަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުންނާއި ވަޒީރުންނެވެ.
މުޅި މުބާރާތުން ޙާފިޡުގެ ގޮފިން، އެއްވަނަ ޚާޞިލްކޮށްފައިވަނީ ތަދްރީސުލް ޤުރުއާނުލް ކަރީމްގެ ފަރާތުން ބައިވެރިވި ފާޠިމަތު ޝާޔާ ޒާހިރުއެވެ. މުޅި މުބާރާތުން ނުބަލާ ކިޔެވުމުގެ ގޮފިން އެއްވަނަ ޚާޞިލްކޮށްފައިވަނީ މިލަދުންމަޑުުލު އުތުރުބުރީ އަތޮޅު ކައުންސިލްގެ ފަރާތުން ބައިވެރިވި ޢާއިޝަތު ޝަބާއެވެ. އަދި މުޅި މުބާރާތުން ބަލައިގެން ކިޔެވުމުގެ ގޮފިން އެއްވަނަ ޚާޞިލްކުރީ ހައްދުންމަތީ އަތޮޅު ކައުންސިލްގެ ފަރާތުން ބައިވެރިވި އަޙްމަދު ޝައިމް ރިޟާއެވެ.
މުޅި މުބާރާތުން އެއްވަނަ މުވައްސަސާއަކަށް ހޮވިފައިވަނީ އަލްމަދަރަސުލް ޢަރަބިއްޔަތުލް އިސްލާމިއްޔާއެވެ.
މިފަހަރުގެ ވަނަތައް ހޯދާ ފަރާތްތަކަށް ރައީސް ވަނީ ހާއްސަ އިނާމްތަކެއް ދިނުމަށް ހަމަޖައްސަވާފައެވެ. އެގޮތުން ރައީސުލްޖުމްހޫރިއްޔާގެ ޝަރަފުގެ ފިލަޔާއި، ރައީސުލްޖުމްހޫރިއްޔާ ދެއްވާ 1 ލައްކަ ރުފިޔާގެ ފައިސާގެ އިނާމާއި، ރައީސުލްޖުމްހޫރިއްޔާދެއްވާ ޚާއްޞަ އިނާމުތަކާއި، ބޭނުން ރޮނގަކުން ބޭނުން ޤައުމަކުން ޕީ.އެޗް.ޑީއަށް ކިޔެވުމަށް ރައީސުލްޖުމްހޫރިއްޔާދެއްވާ ޚާއްޞަ ސްކޮލަރޝިޕް ހިމެނެއެވެ.
މިފަދަ މުބާރާތްތަކުގެ ސަބަބުން ކީރިތި ޤުރުއާނަށް ދިވެހި މުޖުތަމަޢުން ދެމުން އަންނަ އަހައްމިއްޔަތު އިތުރުވެ، ޒުވާން ޖީލުތައް ދީނީ ރޫހުގައި ބޮޑުވުމަށް ބާރުލިބިގެންދާކަން ސަރުކާރުން ފާހަގަކުރެއްވިއެވެ. މި މުބާރާތް ބޭއްވުމުގެ މައިގަނޑު މަޤްސަދަކީ ދިވެހި ދަރިންގެ ހިތްތަކުގައި ޤުރުއާނަށް އޮންނަ ލޯބި އިތުރުކޮށް، ޤުރުއާނުގެ ހިދާޔަތާ އެއްގޮތަށް ދިރިއުޅުން ބައްޓަންކުރުމަށް ބާރު އެޅުމެވެ. އަދި ޤުރުއާން ހިތުދަސްކުރުމާއި ތަޖުވީދުގެ ޤަވާޢިދުތަކާއެކު ކިޔެވުމަށް ދަރިވަރުންނަށް ހިތްވަރު ދިނުމަކީ ވެސް މި މުބާރާތުގެ މުހިންމު އެއް މަޤްސަދެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %