ނުކިރޭނެ ކަމަށް އެންގުމުން ދޯނިން ބޭނި 2.6 ޓަނުގެ މަސް ކަނޑަށް
Read Time:2 Minute, 42 Second
މިފްކޯ ބޯޓުން ނުކިރޭނެ ކަމަށް އެންގުމުން މ. ނާލާފުށިީގެ ”ވިންދު 1″ ދޯނިން ބޭނި 2.6 ޓަނުގެ މަސް ކަނޑަށް އުކާލައިފިއެވެ.
މިއަދު އެކްސްގައި އާންމުވި ވީޑިއޯ އެއްގައި“ވިންދު-1“ ދޯނިން ބާނާފައިހުރި ހުރިހާ މަހެއް އެ ސަރަހައްދުގައި އޮތް މިފްކޯގެ މަސް ކިރާ ބޯޓު ކައިރިއަށް އުކާލާ މަންޒަރު ފެނެއެވެ. މި ވީޑިއޯގެ ކެޕްޝަންގައި ޖަހާފައި ވަނީ މިއީ މި ދޯނިން ބޭނި މަސް ނުކިރޭނެ ކަމަށް ބުނުމުން އުކާލާ މަންޒަރު ކަމަށެވެ.
ބައެއް ނޫސް ތަކަށް ދޯނީގެ ފަރާތުން މައުލޫމާތު ދީފައިވާ ގޮތުގައި މި ކަން މިގޮތަށް ހިނގީ މަސް ކިރުވޭނެ ގޮތެއް ނެތި، އަދި ރަށުގައި ވެސް މަސް ގަންނާނެ ބަޔަކު ނެތުމުން ކަމަށެވެ. ދޯނިން ބުނެފައިވާ ގޮތުގައި މަސް ކިރަން ދޯނިން ވަނީ މިފްކޯ ބޯޓު ކައިރީ ކިއުގައި ޖެހިފައެވެ. އަދި އޭރު މަސް ކިރުވުން މެދުކަނޑާލުމާއެކު މިފްކޯ ބޯޓުން އެންގީ ދެން އަލުން މަސް ކިރަން ފަށާނީ 4 ގެ ފަހުން ކަމަށެވެ.
އޭގެ ފަހުން ކިއުގައި ޖެހިގެން ދޯނި އޮތް ނަމަވެސް، މިފްކޯ ބޯޓުން ވަނީ ކިރާ ގަޑި ޖެހުމާއެކު އެތަނަށް އައި 4 ދޯންޏަކުން މަސް ކިރައި، ”ވިންދު 1“ ދޯނިން މަސް ކިރަން ޖެހުމުން ބޯޓް ފުރި މަސް ނުކިރޭނެ ކަމަށް އަންގާފައި ކަމަށް ވެސް ދޯނިން މައުލޫމާތުދެއެވެ.
މިގޮތަށް މިކަން ހިނގި ިއރު، އެ ދޯނިން ވަނީ މަސްތައް އަޅާނެ އައިސް ނެތްކަން ވެސް އަންގައި، މަސްތައް ސަކަރާތް ވެދާނެ ކަމަށް ބުނެ އަވަހަށް ކިރަން އެދިފައެވެ.
މި ދޯނިން ބޭނި 2.6 ޓަނުގެ މަސް އުކާލިއިރު މިއީ 38،000ރ. ގެ ގެއްލުމެއް ކަމަށް ދޯނިން ބުންޏެވެ.
Happy
0 %
Sad
100 %
Excited
0 %
Sleepy
0 %
Angry
0 %
Surprise
0 %